SEKOOP, Elizário Ferreira, hato'o parabéns ba dirijente no membru Kooperativa WEMOF ne'ebé hala'o ona estabelesimentu regras Kooperativa nian.

"Iha Kooperativa espíritu fiar malu, maka importante tebes atu dezenvole Kooperativa ba oin no ha’u enkoraja ba estrutura Kooperativa nian atu servisu maka’as liután, oinsá servi membru sira, oinsá dada ema seluk involve tan iha Kooperativa refere", nia afirma

Nune’e, Ministru Obras Públicas mós fó agradese ba parte SEKOOP ho ninia ekipa tomak, tanba bele fasilita ona formasaun bázika kona-ba lala'ok Kooperativas nian no ikus mai harii CU WEMOF, no husu nafatin apoiu ba parte SEKOOP atu akompaña, superviziona nafatin to'o Kooperativa refere hamrik mesak ho ain rasik.

"Loron ohin ne'e importante, tanba Kooperativa iha ne'e sei ajuda membru sira hodi halo kreditu tanba iha li'ur kreditu ne'e ho funan ne'ebé boot liu", nia dehan

Nune’e mos Prezidente Kooperativa CU WEMOF,  Marcos da Costa, agradese ba apoiu másimu husi dirijente sira iha MOP no sei halo esforsu maka’as hodi implementa koñesimentu sira durante tuir formasaun kona-ba Kooperativa Kréditu nian ne’ebé fornese husi ekipa SEKOOP.

"Agradese ba SEKOOP tanba apoiu ona formasaun, antes ne'e ami la hatene lala'ok Kooperativa maibé agora ami hatene ona kona-ba Kooperativa nian", dehan nia.

Estrutura Kooperativa Kréditu WEMOF ba dahuluk ne’e estabelese liu hosi Asembleia Jerál husi membru sira iha loron 12 fulan Agostu no kontinua iha loron 19 fulan Agostu tinan 2022 no konsege estabelese estrutura ho nia estatutu no rejimentu interna Kooperativa nian.

Serimónia estabelesimentu Kooperativa Kréditu WEMOF partisipa husi dirijente sira husi instituisaun autónomu sira tutela ba MOP, Diretór Jerál no Nasionál sira MOP no SECOOP, no funsionáriu sira iha MOP.

Antes tama ba seremónia fó pose, SEKOOP no MOP inagura uluk Kafetaria BONDIA CU WEMOF nian iha resintu MOP no atribui sertifikadu ba formandu sira ne'ebé maka durante ne'e tuir ona formasaun bázika kona-ba lala'ok Kooperativa nian. (*)