Print this page

Governu Aprova Programa Integra iha Proposta OJE 2023

Ministru Prezidénsia Konsellu Ministru, Fidelis Leite Magalhães. Ministru Prezidénsia Konsellu Ministru, Fidelis Leite Magalhães. Foto Suplay

Tempotimor (Dili)-Governu liuhusi Konsellu Ministru (KM) delibera ona hodi aprova programa sira ne’ebé integra iha proposta Orsamentu Jerál Estadu (OJE) tinan 2023 nian, ba serbisu no entidade sira hotu husi Administrasaun Sentrál Estadu, ba Seguransa Sosiál no ba Rejiaun Administrativa Espesiál Oekussi Ambenu (RAEOA) nian, ne’ebé aprezenta husi Ministru Finansas, Rui Augusto Gomes.

“Servisu no entidade Administrasaun Públika nian hamutuk 105 iha orsamentu prevee ona dolar amerikanu billaun 2,8 hodi finansia ba programa oioin ne’ebé daudaun ne’e aprova. Ba finansiamentu programa sira seguransa sosiál nian, prevee ona dolar amerikanu hamutuk millaun 235 no ba RAEOA nian hamutuk dolar amerikanu millaun 120”, dehan Ministru Prezidénsia Konsellu Ministru, Fidelis Leite Magalhães iha Palásiu Governu, kuarta (07/09).

Proposta ba OJE tinan 2023 nian ne'e inklui Seguransa Sosiál no RAEOA, sei hetan valór totál hamutuk dolar amerikanu 3.155.715.306.

Maibé ida ne’e, sei la inklui orsamentu ne’ebé prevee ba Fundu Kombatente Libertasaun Nasionál, 33% husi orsamentu sei aloka ba kuadru institusionál, 35% ba kapitál sosiál, 11% ba dezenvolvimentu ekonómiku, 18% ba dezenvolvimentu infraestrutura no 3% ba fundu kontinjénsia.

Orsamentu ne’e sei uza hodi finansia programa ne'ebé Governu sei foku ba tinan oin hanesan agrikultura, pekuária, peska no floresta, ekonomia no empregu, turizmu, dezenvolvimentu rurál no abitasaun, ambiente, petróleu no minerál, eletrisidade no enerjia renovável, konektividade nasionál, bee no saneamentu, edukasaun no formasaun, saúde, inkluzaun no protesaun sosiál, kultura no patrimóniu, reforma Estadu, defeza no seguransa nasionál, relasaun internasionál no polítika esterna. (*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items