“Ba aprovasaun regulamentu veíkulu Estadu nian no ba alterasaun dahuluk ba Dekretu-Lei númeru 21/2021, loron 10 fulan-novembru, ne’ebé kria ona Subsídiu Mensál Transporte nian”, dehan Ministru Prezidénsia Konsellu Ministru, Fidelis Leite Magalhães, iha Pálasiu Governu, kuarta (06/09).
Projetu Dekretu-Lei ne’e ho objetivu atu estabelese norma sira kona-ba akizisaun, rejistu afetasaun, jestaun, uza, atribuisaun, manutensaun, reparasaun, monitorizasaun, fiskalizasaun, abatimentu, alienasaun veíkulu Estadu nian.
Tanba ne’e, hanoin mós atu halo ajustamentu balun ba Dekretu-Lei númeru 21/2021, loron 10 fulan-novembru, liliu, atu define katak pagamentu subsídiu mensál ba transporte nian suspende karik atribui ba benefisiáriu veíkulu Estadu nian ba fins pesoál sira, husi data produsaun efeitu atribuisaun nian to’o ninia data remata.
Ho projetu Dekretu-lei ne’e sei revoga Dekretu-lei númeru 8/2003, loron 18 fulan-juñu, kona-ba regulamentu atribuisaun no uza veíkulu sira Estadu nian. (*)