Ezekutivu Diretór Ka CEO Board of Directors husi Bankau Nasionál Komérsiu Timor-leste (BNCTL), Brigido de Sousa hatete, Prezidente Repúblika rasik konvida banku sira ne'e tanba Xefe Estadu hatene dezenvolvimentu banku sira iha Timor-Leste ne'ebé iha balun hasoru problema entermu kona-ba kréditu nian.
“Hanesan ohin prezidente hatene dezenvolvimentu banku iha Timor, e nia mós hatene katak iha problema balun ne'ebé ita-nia komunidade hasoru entermu de asesu kapitál iha banku sira, liliu kréditu”, dehan nia iha Palásiu Prezidensiál Bairo Pite, kuarta (31/08).
Tanba ne'e, Xefe Estadu rasik mak konvida banku sira ne'e hanesan Banco Ncional Ultramarino (BNU), Bank Austrália and New Zeland (ANZ) iha Timor-Leste, Bank Rakyat Indonézia (BRI) Banku Mandiri inklui Banku Nasional Komeriu Timor-leste (BNCTL) atubele hato'o papél no difikuldade sira ne'ebé banku enfrenta liga ho fornesimentu servisu sira liliu kréditu.
“Bangku sira hotu husi banku BNU, ANZ, BRI, Mandiri ho BNCTL hanesan banku lokál, ami hetan konvite husi sua eselénsia Prezidente Repúblika atu rona banku sira-nia papél nomós difikuldade saida mak banku sira enfrenta iha ita-nia rai, entermu de fornesimentu servisu”, hatete nia.
Maibé partikularmente saida mak sai hanesan impedimentu ho obstákulu ba banku sira hasoru mak entermu ba prosedimentu kréditu inklui sira hato'o mós kestaun balun ne'ebé presiza hetan atensaun husi parte relavante sira.
Tanba hanesa Prezidente Repúblika Horta hatene katak kestaun funan ho jurus ne'ebé as, tanba Timor-Leste ne'e hanesan risku atu halo negósiu ne'e sai às, nomós aujénsia husi lei importante sira purzemplu hanesan titulu rai nian ne'ebé dadauk iha ona, ida-ne'e espera katak sei distribui iha tempu badak.
Maibé iha lei balun ke importante tebtebes ne'ebé banku sira propoin tenke iha maka lei kona-ba insolvénsia, nomós lei kona-ba reforsa kontratu no sistema judisiál Timor-Leste depois mós prontidaun seitor privadu atu absolve osan sira-ne'ebé banku sira konsege mobiliza nomós ba banku sira mak presiza atu halo.
Ba situasaun ida-ne'e Prezidente Repúblika rasik promete sei ko'alia ba Primeiru Ministru no Ministériu Finansa inklui BCTL oinsá bele haree kestaun sira-ne'ebe sai hanesan preokupasaun banku sira-nian atu fó kréditu.
“Nune'e bele hetan atensaun lalais atu banku sira bele fó kréditu ho jurus ne'ebé naton e baratu. Ne'ebé ida-ne'e mak sai hanesan objetivu prinsipál husi enkontru ida-ne'e ho sua eselénsia”, afirma nia. (*)