“Ami atu halo investimentu iha Timor-Leste ne'e mai hanesan fó servisu ba ita-nia joven sira iha Timor-Leste, tanba ami haree joven sira barak mak tur de'it la halo servisu, ami haree de'it mós ami-nia laran kanek, nune'e ami sei fó servisu ba Timoroan sira hamutuk 27 mil iha tinan tolu nia laran, depois tinan tuir mai tan mak ita aumenta ba tan 28 no 29 mil”, dehan Prezidente GIG, Michael, Bainhira hasoru malu ho Primeiru Ministru, Taur Matan Ruak, iha Farol, kuarta (31/08).

Ba investimentu ne'ebé planu sei loke iha Timor-Leste ba área rua hanesan area agrikultura no industria me’ebé iha pontesia fó servisu ba sidadaun timoroan.
“Iha área agrikultura no industria nia sei foku liuba hakiak manu, hydroponics, cadeia alimentar, halo ró peskas no ró seguransa nia, industria textil, industria serveja nsst”, informa nia.

Ho planu investimentu ne'e la'ós atu hatun fali empreza sira seluk iha Timor-Leste, maibé hakarak atu halo kompetisaun de'it no fó servisu ba joven sira.

Enkuantu investimentu ne'e sei hahú bainhira sasán sira kompletu ona, no prezidente GIG ho esperansa katak iha tempu badak nia laran investimentu sei  hahú no sei investe iha Munisípiu hothotu la'ós iha Dili de'it.

Entretantu responde husi Xefe Governu katak nia konkorda para kompaña atu halo operasaun iha Timor-Leste hodi bele fó servisu ba Timoroan sira.

“Responde husi PM mak nia kontente tebes tanba kompaña bele mai halo investimentu iha Timor-Leste hodi fó servisu ba Timoroan sira, e kompaña rasik mós kontente tebes tanba bele hetan oportunidade hodi mai halo investimentu iha Timor-Leste”, hatete nia. (*)