Tuir informasaun ne’ebé www.tempotimor.com, asesu iha pájina MOP, Segunda (29/08) katak, Ministru Obras Públikas (MOP), Abel Pires da Silva, reprezenta Primeiru Ministru (PM), Jenerál Taur Matan Ruak, akompaña husi membru Governu sira inaugura reabilitasaun estrada nasionál Hera, Munisípiu Dili to'o Munisípiu Manatutu.

“Tinan ida-ne’e (2022), relasaun amijade entre nasaun rua Japaun ho Timor-Leste tama ona ba tinan 20, kleur ona e iha ámbitu kmanek ne’e duni ohin loron ita marka tan istória foun relasaun di’ak entre nasaun rua liuhusi inaugurasaun estrada nasionál importante ida-ne’e husi Dili ba Manatutu”, dehan Ministru Abel iha inaugurasaun projetu estrada nasionál Hera-Manatutu ne’ebé realiza iha Hera, Postu Administrativu Kristu Rei, Munisípiu Dili.

Ba projetu estrada importante ida-ne’e ho distánsia hamutuk kilómetru 48.74, no orsamentu ba konstrusaun de’it liu millaun $84, aumenta tan ho fundu kontijénsia millaun $3 ho balun, ba de’it manutensaun besik millaun $2, totál orsamentu ba konstrusaun estrada ne’e besik millaun $54 husi Dili ba Manatutu.

Ba estrada ida-ne’e fasilita ona populasaun nia movimentu tomak ba-mai kapitál Dili husi munisípiu Manatutu, Baukau, Lautein no Vikeke.

“Ita hatene nia kualidade oinsá, e reabilitasaun estrada importante ida-ne’e hadi’ak liután ona transmisaun ema no sasán sira no ho nune’e fasilita ona atividade ekonómika iha ita-nia rain”, hatete nia.

Iha ne’e agradese mós ba Ministériu Finansas ne’ebé lidera prosesu tomak, prosesu negosiasaun ba projetu ne’e dezde kedas inísiu, agradese mós ba ekipa husi Ministériu Justisa ne’ebé akompaña iha prosesu reasentementu, ba tékniku sira hotu iha Unidade Manajementu Projetu (PMU) no MOP, timoroan nomós estranjéiru ne’ebé akompaña prosesu konstrusaun durante tinan 4 nia-laran.

Agradese mós ba apoiu no kontribuisaun tomak husi autoridade lokál sira husi Hera, Metinaru to’o Manatutu vila, no populasaun tomak ne’ebé kontribui prosesu konstrusaun ne’e finaliza ho di’ak.

Nune’e mós ba apoiu no suporta husi povu no Governu Japaun liliu ba dezenvolvimentu infraestrutura iha Timor-Leste.

Konstrusaun ba estrdada ne’e konstrui husi kompaña internasionál Sinohydro Corporation Limited hahú husi tinan 2016 no hetan supervizaun husi kompaña konsultór Nippon Koei joint venture ho nia parséiru Filipina Koei no Indonézia Koei.

Embaixadór Japaun mai Timor-Leste, Masami Kinefuchi, sente kontente partisipa iha serimónia inagurasaun estrada nasionál Dili-Manatutu, tanba estrada nasionál ne’e importante tebes hodi fasilita movimentu komunidade nian.

Serimónia inagurasaun ne’e partisipa husi membru Governu Konstitusionál Daualu nian, Autoridade lokál, parte seguransa no defeza, inklui konvidadu sira seluk. (*)