Tuir informasaun ne’ebé www.tempotimor.com, asesu iha pájina BTL, segunda (22/08) katak, Ekipa Diresaun Enjeñaria no Investimentu (DEI) nasionál BTL, E.P, akompaña husi Tékniku Operadór (TO) munisípiu Ermera no Autoridade Lokál sira, foti dadus tékniku iha Bee Matan ka intake Bobtelo, ne'ebé lokaliza iha Postu Administrativu Hatolia A nomós Bee Matan Maubuti-Maet, iha suku Fatubolu no Bee Matan Suir Tling, iha Suku Fatubessi, Postu Administrativu Hatolia B, Munisípiu Ermera.
Ba atividade levantamentu dadus tékniku ne’e, hala’o durante loron tolu, hahú husi loron 17 to’o loron 19 fulan-agostu tinan 2022, ho objetivu atu hatene débitu bee iha bee matan ne'e, molok implementa projetu bee-moos, iha Postu Administrativu rua ne'e.
Molok tun ba terrenu, ekipa DEI-BTL, E.P hala’o uluk reuniaun ho Administradór Postu Administrativu Hatolia A no Hatolia B hodi hetan rezultadu di’ak tanba Administradór sira prontu koopera hodi servisu hamutuk ho BTL, E.P.
Bainhira DEI finaliza levantamentu tékniku, hafoin halo planu no dezeñu ba projetu kona-ba sistema bee-moos refere. (*)