Tuir informasaun ne’ebé www.tempotimor.com, asesu iha pájina MTKI, sesta (19/08) katak, bazea ba dekretu lei númeru 10/2022, 4 liga ba artigu V benefisiárius iha ne’eba temi sidadaun sira ne’ebé laiha direitu atu simu Sesta-Básika.

“Bazeia ba dekretu lei, ami esklui sidadaun sira ne’ebé mak simu saláriu 500 dolares amerika ba leten, kargu titular, ex-titular, Direitór, Xefe departementu”, Kordenadór Jerál Sesta Bázika, Hernani Agostinho Soares, informa ba jornalista iha servisu fatin.

Maibé atu identifika ida-ne’e, sidadaun sira ne’ebé dekretu-lei bandu, atu labele simu produtu Sesta Bázika, Governu husi nia ekipa prepara formuláriu deklarasaun iha terrenu ba sidadaun sira atu priense ho loloos kona-ba sira-nia membru família sira ne’ebé mak deskonfiadu atu labele simu produtu ne’e.

Tanba ne’e, Governu husu ba autoridade lokál atu koopera ho di’ak, tanba sira mak iha koñesementu di’ak liu ho sira-nia komunidade. Maibé atu di’ak liu husu ba sidadaun sira hotu ne’ebé mak dekretu-lei bandu atu labele simu, di’ak liu obdese no deklara frankamente.

MTKI hala’o ona distribuisaun iha suku 4 husi Díli suku Komoro iha aldeia neen hanesan Baia-Leste, Fomento I-III, Naroman no aldeia Golgota, totál benefisiáriu 14.668.

Ermera iha suku Poetete benefisiáriu 11.768, Bobonaro iha Suku Ritabou 7.768 no Likisá iha suku Dato benefisiáriu 9.513.

Husi númeru benefisiáriu ne’ebé mak simu, Governu simu mós lista reklamantes totál hamutuk 6.512, maibé antes atu distribui ba sira, presiza hetan sertifikasaun husi Ministériu Administrasaun Estatal liuhusi autoridade lokál.

“Ami sei jere didiak reklamantes ho didi’ak, tenke hetan sertifikasaun husi xefe suku, tanba sira mak koñese di’ak liu komunidade sira ne’ebé mak hela iha sira-nia suku”, dehan nia.

Tanba MTKI iha responsabilidade ba munisípiu lima hanesan, Díli, Ermera, Bobonaro, Likisá no Ataúro, Rejiaun Administrativu Espesiál Oekussie Ambeno (RAEOA) jere husi autoridade RAEOA nian.

Husi Munisípiu lima ne’ebé mak temi iha leten tuir tabela, MTKI sei fó kontratu ba kompaña 90 mak atu distribui tuir RFQ ne’ebé mak sira hatama mai Ministériu ho totál orsamentu 40 millões dolares amerika, husi totál orsamentu refere, pursentu hitu mak aloka ba kustu operasasionál.

Nune’e husi kompaña 90 ne’e, MTKI prepara ona kalendáriu atu nune’e fahe ba fazes tolu mak hanesan tuir mai, faze primeiru empreza 30 mak sei fahe uluk no faze segundu empreza 34 no datoluk empreza 36 mak sei distribui tan.

“Ami sei tau prioridade ba área ne’ebé mak remotas, liliu fatin sira ne’ebé mak iha tempu udan transporte difísil tebes atu asesu, husi faze tolu ne’e kuandu prosesu la’o di’ak ami-nia distribuisaun sei konklui iha fulan-novembru,” hatete nia. (*)