Tuir informasaun ne’ebé www.tempotimor.com, asesu iha pájina BTL, sesta (19/08) katak, ekipa BTL, E.P hato’o karta notifikasaun ne’e, bazeia ba rezultadu identifikasaun iha suku haat, hanesan suku Aiteas, Sau, Ailili no Ma’abat, Postu Administrativu Manatuto Villa, iha kliénte balun, fulan-tolu ona mak la selu impostu bee, ho nune’e, BTL, E.P Manatutu deside hodi fó notifikasaun ba kliéente sira.

Koordenadór BTL, E.P munisípiu Manatuto informa, karta notifikasaun ne’ebé hato’o ba kliente ne’e, hodi fó tempu ba kliente sira, durante loron 10, atu bele halo pagamentu ou haka ba edifísiu BTL, E.P hodi halo justifikasaun kona-bá la selu tarifa bee, maibé liu loron 10 mak laiha informasaun no kliente sira la bá halo pagamentu, mak BTL, E.P sei ko’a ka dezliga bee ne’ebé dada ou instala ba konsumidór sira nia hela fatin.

Antes aplika selu tarifa bee, ekipa BTL, E.P Manatuto halo uluk sosializasaun, iha aldeia no suku sira, hodi esplika ba konsumidór sira kona-ba oinsá selu tarifa no bazeia ba diploma ne’ebé ko’alia kona-ba selu impostu ne’e

Entretantu aplikasaun selu tarifa bee-moos bazeia ba Diploma Ministeriál númeru 1/2004 loron 11 fulan-fevereiru, ne’ebé ko’alia kona-ba Tabela Tarifária, siknifika katak komunidade sira ne’ebé asesu ona bee husi BTL tenke selu tarifa bee-moos nian.

Bainhira kliénte sira la selu, mak BTL, E.P sei fó notifikasaun, no fó prazu loron 10 atu kliénte refere bele halo pagamentu, maibé kliénte la kumpri mak BTL, E.P sei foti medidas hodi dezliga ou ko’a sistema bee-moos ne’ebé liga ba komunidade sira-nia hela fatin.

Enkuantu kontribuisaun husi selu tarifa bee ne’e, hodi garante sustentabilidade ba manutensaun kona-bá atividade melloramentu sistema bee-moos nomós promove projetu bee foun ba fatin seluk ne’ebé komunidade sira seidauk asesu ba bee-moos. (*)