Tuir informasaun ne’ebé www.tempotimor.com, asesu iha pájina MTKI, kinta (18/08) katak, Vise-Ministra Turizmu Komunitária Kulturál, Inácia da Conceição Teixeira akonpaña husi Diretór Jerál Turizmu, Jelino Soares, Diretór Nasionál Empreendedorizmu Atividade Turístiku, Júlio Ximenes Ribeiro, no Diretór Nasionál Turizmu Komunitáriu Kulturál, Moises Tilman, Diretór Sentru, Cirilo Luis da Silva.

Ba atividade formasaun costumer service ne’e hanesan programa ida ne’ebé prepara husi Diresaun Nasionál Empreendedorizmu atividade Turístiku, no Diresaun Nasionál Turizmu Komunitáriu, kooperasaun di’ak ho sentru treinamentu vokasionál Juventude Kamea Bekora, hodi realiza formasaun ho objetivu atu kapasita joventude sira-nia koñesimentu oinsá servisu atendimentu kliente iha área turizmu, ospitalidade guest house no seluk tan.

Iha abertura formasaun ne’e Vise-Ministra Inácia hatete, ohin loron ne’e, loron ida ne’ebé importante tebes ba faze sigundu (II) nian, ba kooperasaun entre Ministériu Turizmu Komérsiu no Indústria (MTKI) ho Sentru Treinamentu Vokasionál Juventude (STVJ) Bekora bele fornese treinamentu kapasitasaun ba área pilotu turizmu sira ne’ebé agora dadaun dezenvolve hela iha munisípiu.

“Espera katak treinamentu ne’ebé STVJ fó ba partisipantes sira durante loron sanolu-resin-haat (14) sai treinamentu basiku ida ba benifisiáriu sira hodi implementa iha ida-idak nia munisípiu sira ne’ebé estabelese ona programa turizmu komunitáriu”, dehan nia.

Formadór husi Sentru Treinamentu Vokasionál Juventude hatete, durante formasaun sira sei oferese materia kona-ba custumer service oinsá mak atu halo atendimentu ba kliénte liuhusi maneira komunikasaun ne’ebé efisiénte, no durante treinamentu iha mós teoria no prátika, alende ne’e mós sei vizita indústria.

Entretantu partisipante sira ne’ebé tuir formasaun ne’e hamutuk rua-nolu-resin-lima (25) kompostu husi mane na’in-8 no feto (17) mai husi munisípiu Baukau, Vikeké, Likisá, Manufahi no Aileu.

Benifisiáriu sira ne’e sei tuir formasaun customer service durante loron sanolu-resin-haat (14) no sei ensera iha ámbitu loron konsulta popular 30 de Agostu ba dala rua-nolu-resin-tolu. (*)