“E enkontru ne'ebé ami halo ho sira, husu para sira bele envolve kompaña timoroan sira, envolve para bele konsidera kontein lokál iha investimentu ida-ne'e”, dehan nia iha Palásiu Prezidensial Bairo Pite, tersa (16/08).
Ba projetu investimentu ida-ne'e, na'in ba Pelican Paradise rasik aprezenta ona kanlendáriu lansamentu ba Governu katak, sira sei halo lansamentu fatuk dahuluk iha fulan-Novembru tinan 2022.
Tanba ne'e, konsultasaun hotu dadaun hala'o hela, maibé kona-ba dezenu ne'e Pelican paradise ho Ministériu Obras Públika mak halo hela.
“Ne'ebé diskusaun sira la'o hela, ita hein katak kalendáriu ne'ebé marka ona ba fulan-novembru tinan ida-ne'e atu halo lansamentu primeiru pedra bele realiza”, afirma nia.
Husi investimentu Pelican Paradise ne'e rasik sei transforma Tasitolu sai zona ne'ebé atraitivu tanba iha fasilidade otel, iha Sentru Konvensaun ne'ebé bele halo reuniaun akomoda ema liu atus-lima, no iha fasilidade ospitál, iha mós eskola, iha condomíniu, inklui iha reflorestasaun ba foho leten.
“Sira-ne'e e sei lori mai ita hotu, zona ida ne'ebá sai zona representasaun ba imajen Dili ne'e sei sai di'ak liu”, hatete nia.
Maske, lansamentu ba fatuk dahuluk ne'e rasik durante ne'e kontinua muda tanba ida-ne'e prosesu normál ida ne'ebé akontese iha investimentu sira ho nia eskala boot no komplesidade tanba la'ós hari'i de'it fasilidade ida, maibé ne'e dezenvolve zona ida ho nia investimentu lubuk ida.
“Ne'ebé komplesidade sira-ne'e ninia konstrusaun presiza ninia dezeñu no ninia aprovasaun husi entidade relavante sira, inkluindu ho obras Públika ne'ebé konsultasaun sira-ne'e halo”, afirma nia.
Ba parte Governu mós husu bainhira halo ona lansamentu ba investimentu ida-ne'e tenke tama kedas ba faze konstrusaun. (*)