“Ne'e situasaun ida ne'ebé ita-nia kompaña nasionál sira barak seidauk priense kondisaun fasilidade atu tau hahán ne'e, seidauk di'ak entaun bele afeta ba sasán sira sai kondisaun lá di'ak, kuandu fahe foin hatene tanba dala-ruma tula-tula husi armajen ba de'it diretamente fatin distribuisaun, tanba ne'e mak la'ós intensionalmente kompaña sira hanoin atu fahe sasán at”, dehan nia iha palásiu Prezidensial Bairo Pite, tersa (16/08).

Ba situasaun ne'ebé mak kompaña enfrenta hanesan kondisaun atu tau hahan la di'ak, normalmente halo servisu iha buat balun la di'ak maibé vontade atu hadi'a.

Maske iha Kazu balun ne'ebé akontese kona-ba distribuisaun hahán at ba populasaun sira maibé la'ós akontese ba kompaña hothotu.

Tanba iha kazu balun ne'ebé akontese, ida-ne'e iha item ida-rua de'it no la'ós item hothotu, maibé ida-ne'e normalmente husi kompaña sira halo konkordánsia ho benifisiáriu sira atu substitui (troka).

Ho preokupasaun refere mós parte Komisaun Anti Korrupsaun (KAK) ho entidade sira seluk kontinua akompana ida-ne'e nomós husu ema hotu atu kolabora.

“Hanesan balun ne'ebé koto la di'ak, e troka fali ho item seluk ne'ebé inkonkordánsia, sira konkorda malu ho benifisiáriu sira e sira halo sira rezolve kedas iha ne'e”, afirma nia.

Pozisaun MKAE mós hein katak kompaña sira mós sei kontinua hadi'a problema sira ne'ebé mosu.

“Tanba dala-ruma sasan sira-ne'e rai iha armajen ne'ebé kondisaun ladun di'ak entaun tempu fulan-ida hanesan ne'e nia aspetu ne'e bele oin seluk”, dehan nia.

Husu ba jornalista no ba populasaun tomak bainhira deteta funsionáriu ne'ebé manán osan $500 kada fulan, presiza informa Governu inklui  KAK atu prosesu.

“Atu nune'e hothotu servisu atu garante katak sira ne'ebé lei lá permite atu sira simu, tanba Rendimentu liu dolar atus-lima fulan-ida, favor ita kontribui atu nune'e osan ne'ebé ita atribui ba nene'e bele to'o, no programa sesta bázika ninia bele la'o ho susesu”, hatete nia. (*)