“Sensus populasaun no uma kain importante tebe-tebes, Timor-Leste atu tama ba ASEAN, realidade ida-ne’e besik ona, entaun tenke fornese mós ba parseiru sira ASEAN dadus ne’ebé bele hateten siéntifiku, ne’ebé loos duni, estastestika labele manipula, estatistika labele bosok, estatistika tenke kredível 100%”, dehan Horta hafoin partisipa iha serimónia lansamentu ba Sensu populasaun no uma-ka’in 2022, iha Sentru Konvensaun Dili (CCD), segunda (15/08).
Tanba ne'e, husu Prezidente autoridade Munisípiu to'o Xefe Suku no Xefe aldeia atu kontribui halo mobilizasaun no sensibilizasaun ba populasaun sira hodi partisipa no fornese dadus loloos durante implementasaun sensu populasaun tinan 2022.
“Ha’u halo apelu ba Xefe Aldeia, Xefe Suku, Prezidente Munisípiu atu kontribui halo mobilizasaun, sensibilizasaun atu hothotu partisipa, ita hatene iha ita-nia sosiedade no família balun iha tendénsia atu hatete menus”, afirma nia.
Ba lansamentu ofisiál Sensu Populasaun ne'ebé lansa husi Prezidente Repúblika no Primeiru Ministru (PM), Taur Matan Ruak, akompaña mós husi membru Governu no parseiru internasionál ne’e importante tebes no kuaze nasaun sira iha mundu halo hotu ida-ne'e.
Tanba sensu populasaun ne'e sai hanesan nesesidade báziku ida, importante ba Governu, parseiru internasionál, akadémiku, jornalista, no estudante sira atu hatene loloos retratu umanu, sosiál, polítiku, inklui hanesan baze ba Governu hodi planefika didi’ak atu fó resposta ba dezafiu ne’ebé nasaun enfrenta.
Nune'e husu ema hotu atu kontribui fó dadus no resposta loloos ba ajente sira halo pergunta, atu nune’e fulan hira nia-laran bainhira rezultadu sai, públiku sei haree estatístika tinan hira nia-laran nomós korresponde ba realidade sosiál no ekonómiku Timor nian ka la’e.
Tanba haree husi sensu populasaun ida-ne'e bele fasilita Governu no parseiru internasionál sira bele serbisu hamutuk oinsá mak hadi’a di’ak liután dezenvolvimentu rai ida-ne’e nian. (*)