Tuir informasaun ne’ebé www.tempotimor.com, asesu iha pájina RAEOA, sábadu (13/08) katak, Prezidente Autoridade RAEOA no ZEESM Timor-Leste, Arsénio Paixão Bano, akompaña husi Sekretáriu Rejionál Adjunta Prezidente Autoridade Asuntu Reforsu Institusionál, Leonia da Costa Monteiro, no Sekretáriu Rejional Asuntu Komérsiu, Pedro da. C. B. da Silva, Xefe Gabinete Prezidente Autoridade, Maria José Reis, simu grupu transformadores Indústria Aprezenta kreatividades produtu lokál iha salaun Gabinete Prezidente Autoridade Oé-bau.

Prezidente Autoridade, Arsenio Bano, agradese ba grupu aprezentasaun produtu lokál sira ne’ebé iha inisiativa di’ak hodi promove produtu lokál iha RAEOA.

“Politika Autoridade fó apoiu hodi mellora produtu lokál hanesan tais, salendang, no artezanatu sira seluk, grupu sira ne’e laos benefisia husi Autoridade maibé husi ema seluk hola ona sira-nia produtu”, dehan nia.

Tanba ne’e, Autoridade hasai sirkular ida ba funsionáriu hotu iha RAEOA katak loroloron tenke uza salendang no kada fulan uza tais ho objetivu atu hola produtu lokál husi grupu sira no bele tulun ona grupu hodi hetan osan nune’e ekonómia bele sirkula ho di’ak.

“Alinde ida-ne’e mós ba bainaka atu mai enkontru ho ha’u tenke uza salendang hodi grupu sira hetan osan ida ne’e maka polítika autoridade halo”, afirma nia.

Ba uza tais labele moe tanba ohin loron sai ema boot ne’e promove husi tais lokal nian tanba funsionáriu hotu iha RAEOA tenke uza.

Grupu ne’ebé lori produtu lokál mak grupu Moris Foun lori produtu tais, grupu Bok Sufa produtu Tais, grupu Nusat Nasolu kuda Pateka, no grupu Tasiufe tais Pasbola.

Iha fulan kotuk autoridade ho grupu suru tais sira haruka produtu lokál Oekussi nian ba Nasaun Franseza, no aprezentasaun produtu hirak ne’e hanesan preparasaun grupu ba festival iha Nusa Tenggara Timur (NTT) iha Indonézia.

Iha biban ne’e prezidente autoridade ho membru sira konsege hola produtu lubuk ida, enkuantu grupu sira kontente tanba bele autoridade hola produtu lokál. (*)