Tuir informasaun ne’ebé www.tempotimor.com, asesu iha pájina BCTL, sesta (12/08) katak, relatóriu ne’e hatudu katak kapitál Fundu nian iha trimestre ikus ne’e mak billaun US$17.84 kompara ho billaun $19.12 iha fim trimestre dahuluk.

Haree ba relatóriu ne’e mós hatudu katak totál reseita mak simu iha trimestre ne’e hamutuk millaun $49.06 ne’ebé kompostu husi kontribuisaun kontribuinte sira ba Fundu hamutuk millaun $37.63 no pagamentu royalty simu husi Autoridade Nasionál Petróleu no Mineiras (ANPM) mak millaun $11.43.

Rendimentu husi investimentu Fundu nian ne’e hamutuk negativu billaun -$1.028 (minus $1.028 ) kompostu husi kupaun no dividendu ne’ebé simu mak millaun $79.19, mudansa iha valór merkadu nian negativu billiaun -$1.089 no movimentu cambiais mak negativu millaun -$11.86 iha trimestre ne’e. 

Ida-ne’e rezulta rendimentu ba karteira Fundu nian durante trimestre ne’e -5,33% enkuantu rendimentu sasukat (benchmark) nian ba períodu ne’e mak -5,61%.

Pontu importante husi Relatóriu Trimestre ba dala LXIII, ne’ebé kobre períodu 01 fulan-abril to’o loron 30 fulan-juñu tinan 2022, inklui Kapitál Fundus nian mak billiaun $17.84, Osan kontadu brutu fundus nian tama husi kontribuisaun kontribuinte, realeza (royalties) hamutuk mak millaun $49.06, no Osan kontadu líquidu ne’ebé sai husi Fundu durante trimestre ne’e hamutuk millaun $303.52 kompostu husi millaun 300 transfere ba Orsamentu Estadu no millaun $3.52 kobre kustus jestaun nian.

Nomós Rendimentu totál portofoliu Fundu nian iha trimestre ne’e mak -5.33% enkuantu rendimentu sasukat (benchmak) iha períodu ne’e mak -5.61%, no Rendimentu portofoliu instrumentu merkadu finanseiru iha periodu ne’e mak -5,59% kompara ho rendimentu referensia mak -5,88%. (*)