"Trator boot mak ita distribui ona, hamutuk 9 mak hetan ona subsídiu mina hamutuk litru-900, kada trator ida litru-100," dehan Diretór servisu agrikultura Munisípiu Baukau, Moises Lobato Pereira, iha kna'ar fatin, vila nova Baukau, segunda (08/08).

Trator privadu hirak ne’e kompostu husi Padre locateli nian hamutuk 4, empreza acelda 3, komunidade husi ostiku nian-ida, inklui husi oraganizasaun mokatil nian-ida.

Mákina sira hanesan, baku hare no dullas hare kulit sei iha faze rekolla dadus hafoin submete ba nasionál hodi hetan subsidiu kombustível refere, maibé sidauk hatene fo litru hira ba kada makina, tanba seidauk simu informasaun husi nasionál.

"Dadus ne'e mai, primeiru ami tenke halo rekapitulasaun, tuir rekezitu ne'ebé iha mak foin submete ba nasionál, depois tama faze segundu mak sira hetan subsídiu," nia hateten

Razaun Governu fó subsídiu kombustível ba agrikultór sira, tanba kestaun folin kombustível sa’e inklui impaktu husi pandemia covid-19, nune'e Governu fó subsídiu hodi rekopera hikas ekonomia no agrikultór nian, maibé tenke prense kritériu husi Governu.

"Ita nia extensionista sira servisu hamutuk ho autoridade lokál sira rekolla dokumentu balun, liliu númeru trator, númeru makina dulas hare, baku hare no mós fó sira nia kartaun eleitóral," katak nia

Rekolla dadus ne'e, extensionista sira sei foti iha Postu Administrativu Baguai, Baukau Vila, Laga, Kelikai, Venilale no Vemase. (*)