Tuir informasaun ne’ebé www.tempotimor.com, asesu iha pájina MOP, segunda (08/08) katak, Ministru Obras Públikas (MOP), Abel Pires da Silva, KNA konklui ona prosesu tenderizasaun ba públiku, tanba ne’e, iha prosesu verifikasaun dokumentu sei identifika kompaña ne’ebé priénse rekezitu atu sai manán na’in ba projetu sira.

Hafoin hetan manán na’in sei liután prosesu rua mak hetan aprovasaun husi Konsellu Ministru no hetan vistu husi Kámara Kontas, tanba prosesu hirak ne’e remata ona mak Ministériu Obras Públikas foin ezekuta.

“Iha projetu tolu mak konklui ona prosesu tender, agora daudauk ne’e tama ona faze avaliasaun, ne’e mak estrada Letefoho ba Hatubuiliku, Uaiaka ba Kelikai to’o parte balun husi Ossu nomós Laga-Baguia, ne’e taka tiha ona, agora tékniku sira halo hela avaliasaun ba dokumentu sira ne’ebé tama, ne’ebé ita hein, ha’u antisipa iha fulan ida-ne’e nia-laran, maibé bele mós liu, ne’e ita iha ona manán na’in”, dehan nia.

Bainhira manán na’in iha ona sei ba fali aprovasaun husi Konsellu Ministru hafoin haruka ba Tribunál Kontas, Kámara Kontas atu fó vistu, see rua ne’e liu ona ba ezekusaun”, esplika Ministru Abel, iha Palásiu Governu, Dili.

Ba orsamentu kada projetu millaun $20 resin no garante katak, projetu tolu ne’e sei implementa iha tinan 2022, prosesu konkursu públiku hein de’it atu hotu ona ne’e nusa garante sei bele la’o.

“See seidauk tender, dezeñu mós seidauk iha ne’e ita labele garante mais tender la’o ona, taka tan ona, hahú avaliasaun ona ne’e sempre garante, agora foin Augostu, loos ka lae?. Setembru, Outubru ne’e ita ba ona ezekusaun. Ha’u hanoin see buat hotu la’o di’ak, Tribunál fó vistu, Outubru tarde liu parese la’o ona”, esplika nia.

Ba prosesu kontrusaunne’e, akompañamentu husi ADN (Ajénsia Dezenvolvimentu Nasionál) no obras públika rasik iha ekipa hodi akompaña prosesu konstrusaun.

Maibé verifikasaun ba pagamentu liuhusi ADN, nune’e mós rekruta konsultan atu halo supervizaun iha tereñu, tanba ne’e ihsa dalan barak atu asegura projetu ida ho kualidade, maibé dalaruma udan boot ne’ebé mosu parte tékniku sira labele asegura.

Ministru Obras Públikas mós husu ba komunidade ne’ebé hela iha área projetu tolu ne’e nian atu pasiénsia oituan, tanba Governu sei halo esforsu hodi implementa projetu hirak ne’e hodi fasilita movimentasaun ema no komunidade nian liliu bele asesu ba merkadu. (*)