Tuir informasaun ne’ebé www.tempotimor.com, asesu iha pájina MOP, segunda (08/08) katak, projetu sira ne’e hetan ona aprovasaun husi Konsellu Administrasaun Fundu Infraestrutura (KAFI) no deside Komisaun Nasionál Aprovizionamentu (KNA) sei aselera prosesu aprovizionamentu.

“Ba konstrusaun, agora hahú tama lai prosesu aprovizionamentu, hein katak fulan ida fulan rua ne’e iha aprovizionamentu bele remata ne’ebé importante mak ne’e antes udan bele implementa, projetu ida estrada urbanu Maliana nian mak sei kleur oituan tanba orsamentu boot maibé ida Kasnafar no Sarlala nian ne’e sei implementa iha tinan ida-ne’e”, dehan Ministru Abel sira iha edifísiu Ministériu Finansas, Aitarak-Laran, Dili, bainhira partisipa diálogu ba reforsa kooperasaun ba dezenvolvimentu Timor-Leste no Austrália.

Tanba iha loron 03 Augustu aprova projetu hamutuk 6, pakote rua estrada urbana Maliana vila, ida mak estrada Sarlala parte leten, ne’e pruvola kilometru 8 aprova tiha ona, maibé tanba la liu millaun $5 entaun bele ba direitamente aprovizionamentu.

Iha mós projetu seluk mak hadi’a estrada ne’ebé mak sobu iha Lisbutak nian husi parte mota Kasnafar tuun mai Manleu, haree iha estrada naksobu iha liman loos sira ne’e horseik aprova hotu ona e bele avansa ona.

“Horseik deside kedas tempu aprovizionamentu nian mós halo lais, sira husi KNA mós konkorda ho ida-ne’e ne’ebé sei halo lais oituan prosesu aprovizionamentu para bele halo intervensaun dentru tinan ida-ne’e”, informa nia.

Ba estrada iha Malina ne’e orsamentu boot, ho pakote ida millaun $16.3, pakote ida seluk fali millaun $23.5 resin, ho totál kilometru 25.3, ne’ebé iha Maliana vila, iha Sarlala ne’e la to’o millaun $5, tau aspalt husi parte Sarlala tuun antes Air terjun, ba tolu ne’e millaun $5.5, ida estraga estrada monu ne’e (pakote tolu iha estrada ne’ebé hetan estragu kauza husi kalamidade 04 Abril 2021 husi Manleu to’o mota Kasnafar).

“Horseik ami konkorda ba hotu Fundu Infraestrutura (FI) nian maibé kuandu ita haree sei iha tan balun lori fali mai fundu iha liña ministériu Obras Públikas nian, ne’e depende mais horseik aprovasaun ne’e ba hotu FI”, dehan nia.

Projetu reabilitasaun ba estrada ne’ebé hetan estragu kauza husi kalamidade 04 Abril 2021 husi Manleu to’o mota Kasnafar no estrada foun husi Air Terjun to’o Sarlala hafoin hetan aprovasaun iha KAFI sei lori ba KNA hahú loke ona tenderizasaun ba implementasaun tanba projetu ne’e nia orsamentu kada pakote la liu millaun $5.

Entertantu, kona-ba kualidade konstrusaun estrada, téknikamente tékniku sira halo ona dezeñu no hetan ona verifikasaun husi ADN ba implementasaun projetu sira.

Aliende konstrusaun ba estrada ne’ebé hetan estragu husi inundasaun, Ministériu Obras Públikas mós daudauk ne’e prepara ona halo manutensaun ba estrada nasionál sira, atu nune’e udana hetan estragu karik bele atende ho emidiata, nune’e bele fasilita nafatin movimentasaun komunidade no transporte nian. (*)