Tempotimor (Dili) – Deputadu António da Conceição iha audensia komisaun Parlamentu Nasionál nian, Tersa (29/10/19) husu ba Ministru  Transporte no Komunikasaun  (MTK), José Agustino atu promove telekomunikasaun CS Link. Tuir deputadu ne'e, na'in ba telekomunikasaun ne'e timoroan.

"Ita presiza fó oportunidade hodi iha komérsiu livre. Uluk, kuandu iha Timor Telecom de'it, deputadu sira iha ne'e duni mak halo kontra, hodi halo komérsiu livre ne'e. Tanba ne'e, mak ohin iha ona TT, Telemor, Telkomcel. Mas agora rai na'in ida atu halo investimentu ba ida ne'e, ita preokupa fali ninia kapasidade rekursu umanu," dehan deputadu António.

Nia dehan, ita preokupa Timoroan investe iha área ne'e. Maibé la preokupa sira ne'ebé mai lori timor nia osan ba liur.

"Ita preokupa rai na'in ida atu investe iha ne'e. Mas ida ne'ebé mai foti ita nia dolar sai ba liur, ita la preokupa fali. Ita presiza halo sedensia ruma, atu rai na'in mós hahú investe. Nune'e CS Link ne'ebé mak daudaun atu halo kompetisaun iha merkadu, ita fó oportunidade," dehan António.