Print this page

Autoridade Baukau Lansa PMOPA iha Laga

Prezidente Autoridade Munisípal Baukau, Olivio Freitas tesi hela fita simbolikamente ba lansamentu PMOPA iha Postu Administrativu Laga, sesta (05/08). Prezidente Autoridade Munisípal Baukau, Olivio Freitas tesi hela fita simbolikamente ba lansamentu PMOPA iha Postu Administrativu Laga, sesta (05/08). Foto Tempo Timor

Tempotimor (Baukau)-)Prezidente Autoridade Munisípiu (PAM) Baukau lansa ona Programa Mão de Obra Postu Administrativu (PMOPA) iha Postu Laga, Munisípiu Baukau.

“Ohin Postu Administrativu Laga halo lansamentu ba PMOPA ne'ebé asina ona kontratu ho autoridade Munisípiu aloka ona (orsamentu) 50 pursentu, ohin halo lansamentu para sira hala'o servisu”, dehan PAM iha Postu Administrativu Laga, sesta (05/08).

Nune’e, husu autoridade lokál atu ezekuta orsamentu 50 pursentu ne'ebé autoridade Munisípiu aloka ona ho responsabilidade no aprezenta mós relatóriu orsamentu 50 pursentu nian ba autoridade Munisípiu nune'e bele transfere tán 50 pursentu ba faze daruak nian hodi kompleta ba pursentu 100.

Tanba  Programa Mão de Obra ne'ebé Governu implementa iha nível Suku hakarak fó impaktu ekonomika direita ba povu.

“Uluk 24 anos mobiliza povu ne'e partisipa iha funu ba libertasaun, agora mós ita mobiliza sira partisipa iha dezenvolvimentu nasionál, sira labele haree de'it’, afirma nia.

PMOPA iha Baukau lansa ona iha Postu Administrativu Laga no Venilale, enkuantu iha Postu Administrativu Baguia, Baukau Vila, Kelikai no Vemase seidauk implementa maske asina ona kontratu ho autoridade Munisípiu, maibé sei implementa iha tempu besik, tanba orsamentu pursentu 50 autoridade Munisípal halo ona transferénsia ba konta bankária Postu.

Administradór Postu Administrativu Laga, Domingos Loiola José Pereira konsidera, projetu ki’ik  PMOPA importante tebes, tanba bele fó impaktu ekonomika direita ba komunidade.

“Maske oituan, maibé sira kontente, tanba loron ida sira hetan US$5.00 la liuhusi prosesu naruk, tanba sira servisu hotu selu kedas”, hatete nia.

Orsamentu PMOPA 2022 Governu liuhusi autoridade Munisípiu Baukau aloka ba Postu Administrativuu Laga ho montante US$103.470,50 ba atividade hamutuk 51, maibé faze primeiru pursentu 50 nian ezekuta uluk US$51.735,50 ba atividade 11 hafoin Postu aprezenta rezultadu finál ba autoridade Munisípiu mak aloka tán pursentu 50 ba faze daruak nian.

Ba atividade 11 ne'ebé dadaun hahú iha loron 05 fulan-augustu tinan-2022 ba Suku 8 iha Postu Administrativu Laga hanesan halo manutensaun ki'ik, hamos estrada ninin, ateru estrada aat sira iha área rurál, inklui kuda ai-oan tuir planu sei finaliza iha fulan-novembru tinan-2022.

“Atividade ida grupu ida, kada atividade traballadór na'in-20, uluk 2021 nian implementa durante loron 30, agora loron 20 de'it”, hatete nia.

Nune’e husu traballadór atu servisu ho di'ak hanesan sidadaun Timor, labele haree ba valór orsamentu kada loron, maibé haree ba dezenvolvimentu Postu nian, tanba dezenvolvimentu mak ema hotu nia hakarak.

Traballadór Paulino Ximenes agradese ba planu Governu ne'ebé implementa projetu ki'ik liuhusi PMOPA iha nivél Suku, tanba bele fó impaktu ekonomika direita ba povu.

“Maske osan oituan loron ida ami manán $5.00, maibé husu Governu kria nafatin programa hanesan ne'e, nune'e maluk seluk ne'ebé prezisa servisu bele servisu iha loron balun”, rekomenda nia.

Entretantu Postu Administrativu Laga iha Suku 8 hanesan, Atelari, Libagua, Numira, Samalari, Sagadate, Soba inklui Tekinaumata ho Aldeia 57 iha totál populasaun hamutuk 22.486. (*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items