"Ami nia ékipa agora la'o hamutuk hela ho pasajeiru sira, karik sira uza nafatin (kobra pasajeiru US$5.00) sei fó sansaun, iha (Baukau laran) de'it mós iha," dehan Diretór DNTT Baukau, Roberto da Cruz iha resintu Administrasaun Munisípiu Baukau, kinta (04/08).
Bainhira ékipa detekta kondutór sira kontinua kobra kada pasajeiru Dili-Baukau selu US$5.00 mak DNTT sei foti medida hanesan hasai karta konduzaun husi sistema DNTT nian inklui selu multa US$100.000 to'o US$500.000, maibé na'in ba transporte mak haruka kundotór sira kontinua halo nune'e, DNTT sei kansella lisensa transporte inklui selu multa husi US$100.000 to'o US$500.000 tuir diploma ministérial ne'ebé haruka ona ba DNTT.
Nune’e, husu ba pasajeiru sira, atu hato’o keixa ba DNTT, bainhira kundotór sira tenta kobra US$5.00, tanba transporte públiku sira simu ona subsídiu kombustível litru-150 husi Governu.
"Folin mina sa'e sira demo, maibé agora mina iha ona, tanba saida (tarefa pasajeiru) sa'e nafatin," afirma nia
DNTT hahú lansa kupon kombustível ba transporte públiku iha loron 26 fulan-jullu tinan-2022, mikrolete hamutuk 254, angunan 35 inklui bus 51 kada transporte hetan kombustível litru-150.
"Restu karik karreta mak aat la mai, balun karreta fa’an tiha ona ba ema seluk, balun dokumentus mate, entaun sira labele hetan, sira ne'ebé la mai enxe mina automatikamente fulan kotuk sira nia direitu lakon, maibé karik mai tán lori sira nia dokumentus mai para hetan," nia hatete
Enkuantu kritéria ne'ebé antes ne'e DNTT aplika ba transporte públiku atu hetan subsídiu kombustível hanesan foto kopia karta konduzaun kundotór sira nian valídu, kartaun eleitóral na'in ba transporte, lisensa tranjéktu valídu, inspéksaun valídu, inklui kartaun eleitóral kundotór nian tahan ida. (*)
