“Primeiru agradese ba KAK ajuda halo monitorizasaun saida mak ita ejize imediatu no hetan duni, sasán balun ne’ebé aat, tenke troka, no to’o violasaun ne’ebé grave, ne’ebé ita husik KAK halo nia servisu, mak ita haree tipu medida saida mak ba kompaña sira”, dehan Joaquim Amaral ba jornalista sira iha Palásiu Governu, kuarta (04/08).

Bainhira kompaña balun ne’ebé mak halo irregularidade ka hamosu índisius balun, insitituisaun Autónoma KAK mak sei hala'o nia servisu investigasaun, ba kompaña sira ne’ebé mak halo violasaun ba regra ne’ebé publika ona iha Jornál Repúblika.

“Agora depende ba medida, se sasán balun aat, ida ka rua de’it ne’e sei bele troka, se violasaun ne’ebé mak mak kompaña halo ita labele tolera, ita sei haree kontratu ho kompaña ne’e”, afirma nia.

Nune’e Ministériu sei la halo jeneraliza ba kompaña distribuidór Sesta Bázika ne’e, tanba kompaña sira mós Timoroan, nune’e husu nafatin sira hodi halo  responsabilidade ho di’ak.

Tanba Governu hakarak ne'e kompaña distribuidór Sesta Bázika tenke distribui hahán ne’e  kualidade ba povu sira hodi konsumu tuir sira-nia nesesidade.

“Ba kompaña sira kontribui mós garante ba benefisiu sira, sidadaun sira simu tanba ne’e hahán, simu tuir hahán ne’ebé iha kualidade di’ak atu hán”, dehan nia.

Dadaun ne’e Ministru Koordenadór Assuntu Ekonómika mós simu ona relatóriu husi kompaña sira ne’ebé hatudu índisiu katak, iha sasán balun ne’ebé aat nune’e Governu obriga sira troka fali ho sasán seluk. (*)