Tuir informasaun ne’ebé www.tempotimor.com, asesu iha pájina TradeInvest Timor-Leste, segunda (01/08) katak, TradeInvest Timor-Leste lideradu Diretór Ezekutivu, Arcanjo da Silva ne’ebé akompaña husi Diretór Promosaun Esportasaun, Decio Ribeiro, Diretór Relasaun Esterna no Marketing, Roberto Lai, Jestór Rekursu Humanu, Salvador Castro no Sekretáriu Gabinete Diretór Ezekutivu, Flora da Costa, hala’o vizita traballu ba Darwin husi loron 25 to’o 29, fulan Jullu 2022.
Vizita ne’e, ho objetivu atu reestabeleze akordu tékniku entre TradeInvest Timor-Leste no Northen Territory Government Australia hodi bele fó asisténsia tékniku ba promosaun investimentu no esportasaun iha Timor-Leste inklui kapasitasaun rekursu umanu.
TradeInvest Timor-Leste mós halo kordenasaun ho Konsuladu Jerál Timor-Leste iha Darwin kona-ba servisu refere no hetan asisténsia husi Konsuladu Jerál Darwin ho nune’e bele realiza vizita no enkontru iha Darwin.
Durante vizita loron tolu (3), ekipa TradeInvest hala’o enkontru kordenasaun tékniku ho Departementu Indústria, Turizmu no Komérsiu Austrália, Asosiasaun Agrikultór Northen Territory, Northen Territory Sea Food Council.
Nune’e mós halo enkontru no sesaun desiminasuan kona-ba mekanizmu no oportunidade investimentu no esportasaun ho International Business Council ho nia membru sira. (*)