Tuir informasaun ne’ebé www.tempotimor.com, asesu iha pájina MOP, sábadu (30/07) katak, Ministru Abel sente kontente ba fatin ne'e, tanba hanesan Suaioan, mota Karau-ulun ne'e nia fatin halimar, mai haris, tanba problema bee laiha dalaruma fase ropa to'o iha ne'e, joga bola to'o Aeroportu, ne'ebé filafali mai iha ne'e hanesan fali uluk istória ki'ikoan fatin halimar iha ne'e.

“Ha'u koñese teb-tebes nesesidade Matai nian, ne'ebé agradese ba ita-nia alin sira, oan sira husi Institutu Petróleu e Geologia - Instituto Público (IPG.IP). Ne'e ema leno rasik, haree ona, kalkula ona mak sira foin deside dehan bee ne'e iha ne'e, ne'ebé posibilidade atu hetan ne'e boot tanba haree ba esperiénsia ne'ebé sira halo ona iha Kribas, iha Laga, Kamera no fatin rua tolu tan, ne'e saida mak sira sukat ne'e loos duni, ita reza favór ida ita-nia inan-aman sira harohan mós ba ita-nia beiala sira, rai lulik iha ne'e para ajuda ita-nia oan sira hetan duni bee tanba importante tebes ba suku rezisténsia ida-ne'e, komunidade barak boot ha'u mai filafila ona iha Matai buat ida de'it mak sira husu, bee ne'e tenke rezolve tanba ne'e mak ohin loron ne'e ha'u mai to'o iha ne'e”, Ministru Abel.

Aliende ne'e, Ministru hatete, nia ba la'ós asuntu bee loos de'it, bainhira vizita iha ne'e mós atu deklara katak estrada ida ohin ko'alia ne'e, husi Aeroportu ba to'o Gembora ne'e hatama ona ba tinan 2023, ne'ebé hein katak tinan 2023 mai tan inaugura bee ba inan-aman sira iha Neolaran, nomós lansa estrada ida-ne'e.

Ministru mós agradese ba IPG ne'ebé halo ona perfurasaun ba bee-moos iha fatin refere no husu ba komunidade tomak atu apoiu, tenke kuidadu kanalizasaun sira bainhira instala ona bee ba komunidade.

Vise Prezidente Institutu Petróleu e Geologia - Instituto Público (IPG.IP), Oktoviano Viegas Tilman esplika, kon-ba papél IGP.IP nian halo peskiza ba rikusoin iha rai-laran, tanba ne'e apoiu komunidade halo estudu hodi identifika poténsia halo perfurasaun ba bee-moos iha suku Matai.

Hafoin halo perfurasaun, IPG.IP sei entrega ba Bee Timor-Leste Empreza Públika (BTL.EP) no Autoridade Nasionál Água no Saneamentu (ANAS.IP) hodi jere distribui ba komunidade iha área refere.

Tanba ne’e, IPG agradese ba autoridade lokál ho komunidade iha suku refere ne'ebé apoiu másimu iha prosesu perfurasaun.

Nune'e Xefe Suku Matai, João Gusmão, agradese tebes ba Governu liliu ba IPG.IP ne'ebé ajuda halo ona perfurasaun ba bee-moos, tanba dala-barak fura bee lasai maibé mina mak sai fali, tanba ne'e xefe suku lori komunidade nia-naran agradese ba IPG ne'ebé konsege identifika bee hodi fornese ba komunidade Matai.

“Agradese ba Governu atu bele rezolve ami-nia problema ne'ebé ami ezije iha tempu naruk no ne’e sai istória ne’ebé husik hela ba suku no aldeia ida ne'e”, xefe suku Matai.

Xefe Suku espera, estudu ne'ebé di'ak husi IPG, bainhira komunidade konsumu bee ne'e sei la fó impaktu ba komunidade tanba perfurasaun ne'e tuir estudu entaun bee-moos sei la kontamina ho mina.

Prosesu inísiu ba perfurasaun bee-moos ne'e, lia-na’in sira hamulak tuir kultura suku refere nian hodi husu lisensa nune'e perfurasaun ne'e bele la'o ho susesu.

Komunidade ne'ebé partisipa másimu iha lansamentu ne'e agradese tebes tanba tinan barak ona la asesu ba bee-moos, no espera iha perfurasaun bele fornese bee-moos ba komunidade. (*)