Ba Mákina tratór-liman, karósa no roller unidade 55 ba grúpu foinsa'e agríkultór 10 husi Munisípiu 7, Manufahi, Lautein, Manatutu, Vikeké, Covalima, Ainaro, no Baukau.
Vise Ministru Agrikultór no Peskas, Abilio Xavier de Araújo, sente urgullu tanba parseiru dezenvolvimentu liiu FAO ne’ebé finansiamentu husi Uniaun Europeia konsege distribui ona mákina ba agrikultór sira.
“Ministériu Agrikultura hamutuk ho parseiru dezenvolvimentu liliu FAO ne’ebé halo esforsu maka'as oinsá mak atu ajuda agrikultór sira liuhusi distribui mákina sama lehe, depois mákina Hand Traktór ho karosa” dehan nia bá jornalista sira iha komunidade nia to’os iha Betanu, Postu Administrativu Same vila, Munisípiu Manufahi kinta (28/07).
Mákina traktór-liman ne'e grupu agríkultór sira utiliza hodi sama lehe ne'ebé grupu agríkultór sira kuda iha tós laran, nune'e agríkultór sira bele kuda fali batar, fore keli no ai-horis sira seluk, tanba konservasaun agríkultura liuhusi kuda lehe iha tós laran hodi hamaten du'ut no aumenta rai nia bokur, la presiza ona lere, sunu no fila ho tratór, maibé uza de'it traktór-liman sama lehe no agríkultór sira bele kuda ona ai-horis.
Sekretária Estadu Kooperativa nia parte prontu atu ajuda fó formasaun ba grupu hirak ne’e hodi sai Kooperativa ida atu asegura nia sustentabilidade iha grupu hirak ne’e hodi suporta família sira-nia ekonomia, tanba atividade ne’ebé mak grupu ida sira ne'e hala’o nu’udar grupu produsaun ida tanba ida-ne’e oinsá suporta nia família sira.
“40% imi hetan mákina ne’ebé di’ak, ami-nia Diresaun ida iha atu eduka joven sira atu forma Kooperativa e atu kria auto empregu ba aan rasik atu asegura sustentabilidade makina ne'e entaun makina sira ne’ebé mak oferese ba ita-boot sira atu asegura sira-nia sustentabilidade ita-boot sira bele organiza malu, parte Sekretária Estadu Kooperativa prontu atu Fasilita formasaun no edukasaun, no hahán sira ne’e Sekretária Estadu Kooperativa mak prepara”, hatete SEKOOP, Elizário Ferreira iha Betano.
Dadaun ne’e, SEKOOP iha Programa lubuk ida prepara ba juventude sira mak hanesan, lori joven fila ba kampu, estabelesimentu Kooperativa, no Kria merkadu ba agrikultór sira.
“Agrikultór sira tenke sai agrikultór ida pro-ativu, iha Kintal, organiza oinsá atu ema moris hanesan grupu, tanba dadaun ne’e ami Kooperativa iha programa mak hanesan, lori joven fila ba kampu, no programa seluk mak hanaran estabelesimentu Kooperativa, no programa ida seluk mak merkadu ba agrikultór sira”, esplika nia.
Merkadu agrikultór sira mak hanesan, SEKOOP halo ona servisu ho Care Internasionál hodi hola komunidade no produtu sira hodi fahe ba kada eskola sira liliu ba programa edukasaun nia mak hanesan, Merenda Eskolar.
Merkadu seluk ne’ebé mak prepara mak hanesan, hola produtu sira fahe ba insitituisaun estadu sira aman hanesan, Polísia Nasionál Timor Leste (PNTL) no FALINTIL-Forsa Defeza Timor-Leste (F-FDTL) inklui halo merkadu livre iha fronteira sira.
Atende ne’e, Reprezentante FAO Indonézia no Timor Leste, Arial Rajendra hatete, FAO apoiu agríkultór sira iha Timor-Leste, hodi dezenvolve konservasaun agríkultura, hasa'e produsaun agríkula iha rai laran ba sustentabilidade ai-hán, liliu apoiu ba programa merenda eskolár hasa'e Nútrisaun ba alunu sira, hodi responde ba krize funu mundiál entre Ukránia no Rúsia ne'ebé fo impaktu ba mundu inklui Timor-Leste.
“Ne'e parte projetu boot ida ne’ebé serbisu hamutuk ho Ministériu Agrikultura, hodi suporta programa Konservasaun Agrikultura ida-ne’e entaun ohin ne’e serimónia entrega ekipamentu Hand Traktór sira ne'e, ne’ebé mak produz iha Timor-Leste”, afirma nia.
Mákina tratór-liman, karósa no roller unidade 55 ba grúpu foinsa'e agríkultór 10 husi Munisípiu 7, Manufahi, Lautein, Manatutu, Vikeké, Covalima, Ainaro, no Baukau. (*)
