“Ha'u ezije para relatóriu ne'e hatama, ha'u lahalimar ho ema sasán estadu tenke jere ho di'ak, sé relatóriu laiha, ha'u haruka auditória tuun buka tuir tanba saida”, dehan nia iha resintu SEFOPE Baukau, kinta (28/07).
Tanba ne’e, Autoridade Munisípiu Baukau informa, orsamentu ba PMOPA nian Governu liuhusi Autoridade Munisípal Baukau asina ona akordu ho Administradór Postu Administrativu sira iha Baukau no transfere uluk ona faze dahuluk nian montante $50.000 ba kada Postu Administrativu atu implementa servisu, no faze segundu nian tuir planu sei transfere tán iha fulan-setembru tinan-2022.
Maibé Postu Administrativu Baukau Vila, Autoridade Munisípal seidauk transfere orsamentu PMOPA nian no asina akordu ho Administradór, tanba relatóriu PMOPA 2021 nian seidauk entrega husi Administradór.
“Ha'u lahatene tanba saida sira seidauk esplika ba ha'u, relatóriu ba as vez sira halo kouta ho loja seluk ba fali relatóriu, ne'e ha'u la aseita para hanesan ne'e, kouta ne'e sé mak manán nota ne'e tenke husi loja manán kouta ne'e, la'ós manán iha Baukau nota mai husi Dili ne'e laloos”, afirma nia.
Ho orsamentu ba PMOPA tinan-2021 nian ho montante $50.000, maibé fizikamente jere ba servisu nian relatóriu laloos, nune'e fó impaktu ba PMOPA tinan-2022 nian to'o ohin loron seidauk asina akordu ho Administradór Baukau Vila.
Administradór Postu Administrativu Baukau Vila, Isencinio António da Silva hatete, PMOPA iha Postu Baukau Vila seidauk implementa, tanba presiza kompleta relatóriu PMOPA 2021 nain hodi aprezenta ba autoridade Munisípal.
“Ne'e tempu sesante nian, maibé ita buka rezolve para implementa iha fulan-Augustu”, esplika nia.
PMOPA 2022, Postu Baukau prepara atividade hamutuk 64, hanesan limpeza, kuda ai-oan iha bee matan, reparasaun estrada ho eskala ki'ik nune’e hetan komunidade bele osan hodi rekopera ekonomia uma laran. (*)