Tuir informasaun ne’ebé www.tempotimor.com, asesu iha pájina MOP, kinta (28/07) katak, MOP husu ba komunidade sira iha área Bebonuk apoiu ba prosesu resenseamentu.
“Kona-ba estrada Bairro Pite nian, eis Perumnas ne’e ita iha ona dezeñu, oituan tan kompletu ona, ha’u antisipa katak dentru de tinan ne’e ita bele ona halo reabilitasaun ba estrada iha eis Perumnas nian, agora parte husi Perumnas ba to’o Ailok-Laran iha Mota Maloa nia leten ne’e mak ita seidauk tama iha planu. Ohin mós ha’u ko’alia ona ho Diretós estrada nian para halo oinsá para bele haree hatama iha planu”, dehan Ministru Obras Públikas Abel Pires.
Ministériu mós hein dezeñu, tanba dezeñu atu hotu ona, bainhira dezeñu hotu ne’e bele hatene ona ninia montante (orsamentu ne’ebé sei aloka ba projetu ida).
Ba projetu ne’e, Kompaña Kiar Konsultan mak kaer, kompaña ne’e la’ós haree ba (Perumnas) de’it, maibé haree ba Delta mós iha, Área Branka mós halo dezeñu hotu ba iha ne’eba, lubuk ida iha Dili laran.
“Tinan ne’e ita iha 52KM Dili laran nian ne’e mak ita tenta hela, see dezeñu ne’e hotu ona Aimutin mós tama entaun ita bele halo konstrusaun dentru tinan ne’e, ha’u fiar”, afirma nia.
Ministru Obras Públikas mós husu komunidade afeitadu iha konstrusaun estrada urbana diresaun área Bebonuk nian hodi apoiu prosesu resentementu ba komunidade afeitadu sira, nune’e bele fasilita konstrusaun estrada iha fatin refere bele la’o ho di’ak tanba projetu ba reabilitasaun estrada iha ona manán na’in maibé seidauk implementa tanba problema iha resentementu.
“Kona-ba Bebonuk ne’e projetu ezistente atu hadi’a estrada ne’e iha tiha ona, ita-nia problema ho projetu ne’e mak reasetementu, kompaña manán ne’e kleur ona maibé tanba iha dezafiu barak iha reasentementu, ita-nia komunidade barak mak seidauk fornese sira-nia rain entaun defikulta projetu ne’e atu implementa lalais to’o agora mós seidauk bele rezolve, karik ita hetan kooperasaun husi ita-nia komunidade sira ne’e sei ajuda obras para bele servisu hamutuk ho kompaña ne’ebé manán ne’e para bele halo obra ne’e hotu lalais”, hatete Ministru Abel.
Tanba ne’e, finalizasaun projetu ne’e depende ba komunidade nia laran kamán atu apoiu tanba projetu ne’e sei kona moru, uma lubuk ida, nune’e husu atu komunidade sira bele apoiu, sein kooperasaun husi komunidade sira kompaña labele kontinua hadi’a estrada refere.
Durante ne’e, projetu reabilitasaun estrada iha Bebonuk diresaun transporte Mikrolet 09 seidauk avansa tanba prosesu resentementu mak seidauk finál, bainhira finaliza ona kompaña sei halo reabilitasaun. (*)