“Progresu distribuisaun Sesta Básica, ne’ebé mak lansa husi Ministru Turizmu Komérsiu no Indústria, José Lucas do Carmo da Silva, hahú iha aldeia Baia-Leste, suku Komoro iha loron-17 fulan-juñu tinan-2022, to’o ohin loron distribui ona iha suku haat, hanesan suku Poetete iha Munisípiu Ermera, suku Ritabou iha munisípiu Maliana no suku Dato iha munisípiu Likisá”, dehan komunikadu imprensa ne'ebé www.tempotimor.com asesu husi gabinete MTKI, kuarta (27/07).
Bazeia ba dadus populasaun sira ne’ebé mak benefisia ona Sesta Bázika iha suku Komoro mak aldeia Baia-Leste, Fomento I-II-III, Naroman no Golgota hamutuk benefisiáriu 14.665 husi uma-ka’in 3.032 ne'e distribui husi kompaña Leader, Lda.
Nune'e mós ba Benifisiáriu aldeia 12 iha Suku Poetete, Munisípiu Ermera ne'e totál benefisiáriu hamutuk 11.768 husi uma-ka'in 2.290 mak simu ona sesta Bázika ne'ebé distribui hosi kompaña Betuhei.
Ba suku Ritabou Munisípiu Bobonaro ne'e benefisiáriu hamutuk 3.352 husi uma-ka'in 680 mak simu ona husi kompaña Bobolait no suku Dato munisípiu Likisá benefisiáriu hamutuk 6.479 husi uma-ka'in 1.482 distribui hosi kompaña Hanaroman Brilliant, Lda.
Iha porsesu distribuisaun ne'e Sekretariadu tékniku Sesta Bázika husi MTKI sempre halo kolaborasaun Komisaun Anti Korrupsaun (KAK), Provedoria Direitus Humanos no justisa (PDHJ), AIFAESA, nomós ekipa monotirazasaun no avaliasaun husi MTKI hodi halo monitorizasaun na prosesu distribuisaun sesta Bázika iha Suku hirak ne'e.
Durante atividaee monitorizasaun iha terrenu mós deskobre katak, presiza hadi’a nafatin iha prosesu distribuisaun sesta bázika, nune'e Sekretariadu Sesta Bázika no instituisaun monitorizasaun no prevensaun sira mós sei fó hanoin ba malu nafatin oinsá hadi’a regulamentu no regras produtu antes distribui ba komunidade sira tuir direitu ne’ebé mak regula ona. (*)