Tuir informasaun ne’ebé www.tempotimor.com asesu iha pájina MAE, segunda (25/07) katak,  Ministru Miguel “ hatete, nia parte kontente teb-tebes tanba primeiru konsege garante ona direitu populasaun sira-nian hodi oferese fatin ida dignu ba sira atu hela, no iha direitu ida seluk ne’ebé mak presiza hakonu tan, no sira bele goja ona konforme konstituisaun proteje.

“Ohin ha’u ko’alia ho benefisiáriu balun sira kontente ona tanba hetan uma, maibé sira husu nafatin ba Governu hodi halo mós uma ba populasaun sira seluk ne’ebé mak seidauk hetan. Ha’u hanoin la’ós de’it iha suku ida-ne’e maibé iha suku sira seluk iha Postu Admistrativu Uatulari no suku sira hothotu iha Timor laran tomak”, dehan Ministru Miguel Carvalho.

Tanb ne’e, hatudu katak populasaun iha Timor-Leste barak mak kondisaun uma ne’e ladun dignu, infelismente bele hahú ona ho intervensaun ba populasaun sira ne’ebé kbi’it laek iha númeru ida ne’ebé boot iha teritóriu Timor laran.

Ba tinan 2022 Governu halo 4.000 uma ba ema kbi’it laek ho uma kbi’it laek plus (UKL+) tenta mós halo intervensaun atu aumenta tan uma lubun boot ida iha territóriu Timor-Leste laran tomak.

Postu Admistrativo Uatulari mós benefisia uma kbi’it laek iha forma de distribuisaun kalen ba populasaun sira ne’ebé mak nia uma kalen át iha Postu Admistrativu refere.

“Ha’u hanoin UKL+A ne’e ita mós sei halo reabilitasaun no rekonstrusaun ba uma husi família sira ne’ebé mak kbi’it la’ek duni. Ha’u mai iha Postu Admistrativu Uatulari atu inaugura Uma Kbi’it La’ek ne’ebé mak iha Suku ida-ne’e hola parte, e husi Uma Kbi’it La’ek sanulu-resin-ualu (18) ne’ebé mak iha Postu Admistrativu Uatulari kompostu husi Suku Afaloikai, Aldeia Uai-kai, Suku Matahoi, Aldeia Mau Kiak, liuhusi Programa Nasional Dezenvolvimento Suku ne’ebé mak konstrui iha 2021”, hatete nia.

Tanba iha tinan kotuk hahú konstrui uma tolu kada suku, entaun hahú hamutuk ho Xefe Suku, tama iha benefisiáriu suku ida-ne’e nian atu haree no entrega xave nomós haree uma ne’e laran.

“Ha’u kontente hodi oitavu Governu konstitusionál nia naran bele mai to’o iha Postu Admistrativu Uatulari haree progresu implementasaun PNDS nian ho Jerál. Ha’u kontente rona planu Xefe Suku sira-nian, komunidade hothotu iha suku ida-ne’e kona implementasaun uma kbi’it la’ek nian iha tinan 2022, ita-nia populasaun hothotu hato’o sira-nia preukupasaun dehan katak ami simu ona, maibé agora ami-nia maluk sira ne’ebé mak seidauk e kondisaun hanesan mós ami hein hela ita-boot sira bainhira mak atu halo ida hanesan ami agora daudaun ne’e hanesan ho sira”, katak nia.

Tanba ne’e hanesan mensagem ida ba Governu sentrál, nomós ba Governu sentrál ne’ebé sei tuir mai, presiza tau matan nafatin ba populasaun sira vulneravel hanesan sira ne’ebé kbi’it la’ek atu hetan fatin ne’ebé mak dignu hanesan mós ho maluk sira seluk ne’ebé mak hetan ona.

Aliende entrega uma kbi’it la’ek, inaugura mós edifísiu Sentru Saúde ida iha Suku Makadiké, edifísiu Postu Administrativu Uatulari nian estabelese konforme lei, hanesan sirkunstisaun administrativa, Segundu eskalaun ne’ebé mak rai laran, katak estadu ne’e organizadu iha forma administrasaun sentrál, mak iha Dili, nível Munisipál iha sirkunstisaun Munisipál mak hanesan Munisípiu sira, no segundu eskalaun sirkunstisaun mak Postu Administrativu sira.

Tanba Postu Administrativu sira-nia funsaun mak atu hala’o funsaun estadu nia hotu atu kontribui ba estadu nian. Nune’e objetivu estadu konforme konstituisaun iha artigu 9 maibé ne’e barak tebes iha artigu hamutuk 11 bele habadak, mak atu grarante seguransa ba populasaun sira, no garante povu sira bele moris di’ak. (*)