Print this page

SEKOOP Asina Kontratu ho Kompaña Tolu ba Distribuisaun Sesta Bázika

Diretór Kompaña manán na'in hasai foto hamutuk ho Sekretáriu Estadu Kooperativa (SEKOOP), Elizário Ferreira. Diretór Kompaña manán na'in hasai foto hamutuk ho Sekretáriu Estadu Kooperativa (SEKOOP), Elizário Ferreira. Foto Tempo Timor

Tempotimor (Díli)-Sekretáriu Estadu Kooperativa (SEKOOP), Elizário Ferreira, asina termu kontratu ho kompaña tolu ne’ebé manán na’in ba re-tenderizasaun Fornesimentu Produtu Cesta Bázika-SECOOP ba tinan 2022 nian.

Termu asina kontratu ne’e durante fulan rua ka loron neennulu (60) renova susesivamente nune’e, kompaña sira halo ezekusaun ne’e tenke tuir duni kontratu sira ne’ebé mak publika ona jornál Repúblika.

Molok asina termu kontratu sira ne'e, Sekretáriu Estadu Elizário Ferreira husu ba kompaña sira kontinua sosa komunidade sira-nia produtu molok distribui filafali hodi nune’e komunidade sira hetan benefisiu double.

“Ita-boot sira tenke asegura katak, produtu ne’e tenke mai husi lokál, no na'an ne’ebé mak imi atu distribui na'an ne’e tenke hola iha lokál, para atu fó benefisiu ba sira (komunidade-red)”, dehan nia iha Salaun SEKOOP Akait, kinta (21/07).

Nune’e husu ba kompaña manán na’in sira katak bainhira halo lansamentu distribuisaun Sekretáriu Estadu Kooperativa mós sei ba hodi esplika lala'ok Kooperativa ba povu.

Alende ne’e, kompaña sira mós sei bele hola sosa komunidade nia na'an sira mak hanesan ikan, tanba Sekretária Estadu Peskas (SEP) mós entrega ona lista komunidade sira ne’ebé fa'an ikan iha sira-nia grupu no komunidade sira nian.

“Sekretária Estadu Peskas mós entrega lista ida ba ami iha área ne’ebé mak iha mós ikan, entaun imi bele haree populasaun sira sufisiente iha área ho ikan iha-ne'e”, afirma nia

Diretór Kompaña RJL Brother Unipessoal, Lda, Juviano Lopes hatete, nia kompaña ne’ebé mak manán na’in iha programa nasionál Sesta Bázika ne’e sei distribui iha Maubisse vila, nomós suku Maulau.

Nune’e mós Diretora Kompaña Ervel, Lda, Amelia de Jesus Perreira ne’ebé sei halo distribuisaun Sesta Bázika iha Munisípiu Aileu, iha Suku Liurai, no Suku Lausi inklui mós suku seluk rua iha parte Aileu parte Kooperativa nian.

Daniel Silva Perreira “Maubere” nu’udar na’in ba kompaña husi Aitula, Lda hatete, Aitula sei halo distribuisaun iha Zumalai, parte Suai nian. La’ós ba Zumalai tomak, maibé ba suku sira ne’ebé mak lista ba distribuisaun nian. (*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items