Tuir informasaun ne’ebé www.tempotimor.com , asesu iha pájina AIFAESA, sesta (22/07) katak, koordenasaun servisu ne'e, sei envia amostra sira husi Timor-Leste ba Balai-POM, Kupaun-Indonézia no deside mós ba prosesu teste produtu inklui hala'o formasaun profesionál (on the job training) ba tékniku sira ne'ebé sei halo akompañamentu iha amostra durante teste laboratóriu nian.

Iha serimónia enseramentu ba atividade vizita kortejia ne'e, Xefe delegasaun atuál Sub-Inspetór Jerál, Dionísio Neto da Silva, agradese no apresia ba vontade BPOM nian hahú husi inisiu ba koordenasan ne'e, iha duni komitmentu atu fasilita no apoiu tomak ba AIFAESA iha asuntu laboratóriu no servisu tékniku sira seluk.

Antes realiza serimónia ba enseramentu kona-ba atividade koordenasaun ne'e, ekipa delegasaun husi AIFAESA, IP no delegasaun BPOM nasionál nian hala'o mós vizita ba Hypermart LIPO PLAZA, hodi halo observasaun kona-ba sistema kontrolu ne'ebé BPOM kria no rekomenda ba atividade ekonómika sira liliu ba loza alimentár sira.

Iha vizita ne'e rasik delegasaun sira asesu ba sistema auto kontrolu ne'ebé responsavél ba estabelesimentu ne'e halo hahú husi konservasaun produtu to'o komersializa ba konsumedór sira

Nune'e mós delegasaun rua refere hetan mós oportunidade hodi, halo vizita ba ‘Rumah Kerajinan Rakyat-NTT’ hodi haree kona-ba produtu kulturál sira hanesan, taís, produtu alimentár no la'os alimentár lokál, no seluk-seluk tan ne'ebé konserva iha fatin refere hodi bele gaña no promove valór kulturál husi NTT nian, ba vizitór sira. (*)