"Seiçal tuir planu 120 hetar liu, agora dadaun la'o ona, iha Sabiliu pur-volta 80 hektar bee agora tama ona, agrikultór sira komesa book dadaun ona, segundu epoka ita konsidera pur-volta 200 hetar liu," dehan Diretór servisu agrikultura Munisípiu Baukau, Moises Lobato Pereira, iha salaun uma dame, Uatulete Baukau, sesta (22/07).

Natar hetar 200 ba epoka segundu ne'e, SAMB fó apoiu mós fini ba natar na'in sira no mós apoiu ékipamentus hanesan traktor.

Alende ne’e, dadus kolleta hare ba primeiru epoka tinan-2022, servisu agrikultura Baukau seidauk hetan dadus fixu, tanba iklima udan hatarde natar na'in sira atu kolleta sedu.

Maibé, natar na'in sira hahú ona halo kolleta ba hare, iha Postu Administrativu Baguia sorin, Kelikai sorin, Laga sorin, Venilale sorin no Baukau Vila sorin.

Tanba, hahú fulan-juñu tinan-2022, servisu agrikultura Baukau hamutuk ho natar na'in sira iha Postu Administrativu Vemase, kolleta ona hare hamutuk hektar 600 resin hatudu rezultadu di'ak.

"Rezultadu tinan ida ne'e, dadus konkreta seidauk mai, mais ita konsidera tinan-ida ne'e rezultadu di'ak, tanba ita haree mudansa klimatika udan been di'ak, entaun ita nia maluk barak mak interese halo natar," nia argumenta

Rezultadu kolleta hare iha tinan-2022 di'ak, maibé natar balun iha Baukau kontinua abandona kuaze tinan, tanba Governu la aloka orsamentu ba problema hirak ne'e.

Nune'e tinan-2022, parseiru dezenvolvimentu UNDP sei apoiu halo reabilitasaun no konstrusaun ba irigasaun 4 iha Munisípiu Baukau.

"Irigasaun 2 iha Venilale ida iha Bahamori ida iha Fatulia, ne'e halo reabilitasaun, ida iha Laga konstrusaun, ida iha Vemase reabilitasaun ne'ebé agora tama ona ba prosesu tenderizasaun," nia informa

Konstrusaun no reabilitasaun ba irigasaun 4 ne'e finaliza, garante sei aumenta produsaun hare, tanba bee ba natar di’ak ona natar na'in sira iha ona vontade atu halo natar. (*)