Print this page

Estrada Kotu, Komunidade Baguia Halerik ba Nesesidade Bázika  

Ekipamentu pezadu hadi’a hela estrada ne’ebé kotu iha diresaun Baguia. Ekipamentu pezadu hadi’a hela estrada ne’ebé kotu iha diresaun Baguia. Foto Suplay

Tempotimor (Baukau)-Estrada husi Suku Afaloikai, Osso-huna no Hae-coni liga ba Postu Administrativu Baguia, Munisípiu Baukau, kotu difikulta komunidade nia movimentu atu asesu ba nesesidade bázika.

Xefe Suku Afaloikai, Jermano João Baptista, haktuir, akontese udan boot iha semana ba kotuk, kauza estrada iha área mota basarauai Suku Hae-coni, área lakoidana Suku Osso-huna no iha área samalari Suku Afaloikai nian.

"Estrada kotu besik ona fulan-ida, to'o agora seidauk hadi'a, agora fós, mina tein, masin midar, kafé, laiha ona atu komunidade sosa," dehan nia iha Sentru Konvensõens Baukau (CCB-sigla portugés) vila antiga Baukau, Segunda (18/07).

Maibé, komunidade husi Suku Afaloikai tenke la'o ain ba Postu Baguia ho kilo-metru 12 no husi Suku Afaloikai ba Uatukarbau Vikeke ho kilo-metru 7 atu sosa nesesidade báziku.

"Sira la'o ain, balun ho kuda ou la'e sira aluga motor mak ba tula iha Afaloikai Uatulari Vikeke nian, dala ruma ba fali sosa iha Postu Baguia”, nia informa

Antes estrada seidauk kotu, loja na'in sira ho karreta lori sasan tama to'o Suku refere hodi komunidade sira sosa nesesidade bázika sira, maibé dadaun estrada kotu difikulta movimentu transporte.

"Senti triste tebes, tanba komunidade atu sosa fós susar tebes, husu Governu aselera normalizasaun estrada ligasaun Suku 3 nian ne'ebé dadaun kotu, tanba komunidade halerik ona ba nesesidade bázika, agora komunidade balun konsumu de’it ona, aifarina talas no fehuk," nia argumenta

Maske iha loron 06 fulan-jullu tinan-2022, Ministéru Obras Públika (MOP) orienta ona kompaña lokál halo normalizasaun, maibé ékipamentus ne'ebé hala'o servisu iha tereñu avaria.

"Obras Públika haruka kompaña ida mak halo iha ne'eba, ateru husi Postu Baguia sa'e ba mota basarauai, mais agora korente skavatór kotu, ne'ebé to'o fulan Jullu remata mós estrada seidauk di’ak," nia hatete

Enkuantu Suku Afaloikai iha Aldeia 4 hanesan, Aldeia Lena ho xefe familía 37, Buibela ho xefe familía 41, Uaimata ho xefe familía 76 no Aldeia Okilari ho xefe familía 89.

Administradór Postu Baguia, António Ramos, hatutan, parte autoridade relata ona pedidu ba parte relevante no orienta kompaña lokál halo normalizasaun, maibé dadaun pezadu iha tereñu avaria.

"Dadaun komunidade husi Suku 2 Osso-huna no Afaloikai infrenta transportasaun nesesidade bázika no sira la'o ain to'o Postu Baguia mak foin sosa," nia informa

Postu Administrativu Baguia iha Suku 10, Xefe familía liu 2.000, ho nia populasaun hamutuk liu 14.00. (*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items