Prezidente KSTL Almeiro Vilanova, hatete, konflitu mosu iha servisu fatin entre traballadór ho empregadór, tanba parte rua laiha konfiansa ba malu, tanba empregadór no traballadór seidauk hatene lei labóral.
"Tanba ne'e, KSTL CCITL iha obrigasaun implementa sosializasaun lei nú.4/2012 ba empregadór ho traballadór sira iha teritóriu nasionál ho tema prosedura no mekanizmu tratamentu keixa atu reduz konflitu iha nivel empreza nian," dehan nia iha salaun enkontru São José Dioseze Baukau vila antiga, tersa (19/07).
Durante KSTL ezisti konsege rejistu kazu keixa hamutuk rihun 7 resin no barak emregadór hapara traballadór husi servisu, inklui salariu ba traballadór nian minimu, tan ne'e hamosu konflitu.
Kazu balun konsege rejolve, maibé iha ida ou rua mak obriga to'o arbitrajem, tanba konsidera grave.
"Ita iha obrigasaun kanaliza informasaun ba traballadór ho empregadór sira atu hatene, sé traballadór ida viola nia dever, signifika viola empregadór nia direitu no empregadór viola nia dever signifika nia viola traballadór nia dirietu," nia hatete
Nune'e, liuhusi sosializasaun atu fó hanoin ba empregadór no traballadór sira atu hatene direitu no dever hodi labele hamosu konflitu iha servisu fatin.
Reprezenta CCITL, Norberto José Monis, hatete, CCITL mahon ba setór privadu hotu-hotu iha Timor-Leste (TL), tanba ne'e ho KSTL hahú haree prosedimentu no halo sosializasaun hodi reduz keixa sira.
"Entaun atu habadak prosesu keixa husi traballadór kona-ba nia empregadór iha servisu fatin mak ita haree ho sosializasaun ba parte rua traballadór ho empregadór atu iha problema ruma la presiza ba keixa," dehan nia
Tuir nia, problema ki'ik entre traballadór ho empregadór bele rejolve iha servisu fatin, maibé la komprende, entaun tenke halo keixa iha Polísia Nasionál Timor-Leste (PNTL), Tribunál inklui Sekretáriu Estadu Formasaun Profesional e Empregu (SEFOPE).
Tanba, kazu entre traballadór ho empregadór ne'ebé rejistu iha SEFOPE pur-volta 100 kada fulan.
"Signifika traballadór ho empregadór seidauk tuur hamutuk solusiona problema sira iha servisu fatin, espera ho sosializasaun empregadór ho traballadór ba futuru dadus keixa sei menus,” nia hatete
Partisipante, Valente Ximenes husi loja Dadagua, sente kontente ho sosializasaun, tanba bele fó hanoin kona-ba direitu no dever traballadór nian.
"Sosializasaun importante ba ami empregadór sira atu hatene dirietu no dever ami ho traballadór nian, tanba ne'e agradese ba KSTL ho CCITL," nia hakotu. (*)
