Diretór Jerál Dezenvolvimentu Rural, Ministéru Administrasaun Estatál (MAE), Rozito Guterres, hatete, Autoridade sira husu atu Governu kontinua implementa PMOPA, tanba benefisia direita ba povu.

Nune'e, iha tinan-2022 Governu tau Orsamentu Ratifikativu (OR) tokon US$7.2 ba PMOPA, Ministéru Finansa (MF) sei transfere ba konta bankaria kada Munisípiu nian tuir dekretu lei no.03/2016, hodi implementa sub-atividade rihun 35 iha Teritóriu laran tomak.

"Husi atividade rihun 35 ne'e, atu enkarrega traballadór informal (traballadór informal mak traballadór ne'ebé servisu hotu tiha simu kedas osan) iha teritóriu laran tomak ne'e, rihun 67 iha Postu Administrativu 62 ne'ebé tinan-ida ne'e simu programa Mão de Obra," dehan Rozito iha asina akordu PMOPA ho Administradór iha Sentru Konvensõens Baukau (CCB-sigla portugés), Segunda (18/07).

Atividade ba PMOPA atu asegura ambiente moos, halo manutensaun ki'ik ba infraestrutura públiku bee dalan sira ne'ebé hetan estragus, halo reparasaun ba estrada sira iha Suku, inklui sai rekursu ba resposta dezastre natural sira.

"Vantajem husi PMOPA mak Postu iha ona osan ki'ik halo atividade hadi'a ona buat balun iha ambiente ne'eba, seluk mak buat ne'ebé Postu labele hein tán Governu sentral, tanba osan mai tiha ona, ne'ebé bele enkarrega ema hadi'a jestaun sira halo manutensaun ki'ik ruma, segundu kria servisu informal”, dehan nia

 Tanba, durante Covid traballadór latama loron-ida nia lakon, entaun programa ne'e atu subtitui hodi rekupera ba nesesidade.

Prezidente Autoridade Munisípiu (PAM) Baukau, Olivio Freitas, hatutan, polítika Governu nian tau osan montante boot ba PMOPA, tanba hakarak fó impaktu direira ba povu.

"Kada Postu Administrativu hetan mais rihun US$10 ba leten, ha'u ajita sira aselera sira (Administradór) nia mekanizmu para Novembru sira ne'e osan hotu tenke ezekuta hotu, sé la'e osan tenke fila hotu ba nasionál," nia hatete

Atividade PMOPA nian ba Munisípiu Baukau hamutuk 351, kada atividade sei aplika ema na'in-20.

Husu Administradór sira atu jere PMOPA ho di'ak ikus aprezenta relatóriu ho nota husi loja fornesedór ne'ebé manan iha koutasaun.

Tuir planu PMOPA iha Munisípiu Baukau sei implementa iha loron 19 fulan-jullu tinan-2022 (aban) ba Suku 59 iha Baukau laran tomak.

"Agora asina tiha koutasaun, aban ba oin sira implementa ona ba Postu ida-idak iha nia Suku, Baguia iha Suku 10, Kelikai iha Suku 15, Laga iha Suku 8, Venilale Suku 8, Vemase Suku 7 Baukau iha Suku 11," nia informa

Nune'e, Xefe Suku Laisorulai Decima, Cipriano Cabral, agradese ba planu Governu nian ne'ebé implementa Programa Mão de Obra ba kada Postu Administrativu no to'o iha nivel Suku hodi fó benefisia direita ba povu.

"Ida (PMOPA) primeiru ne'e servisu hotu ona, ba segundu faze ami hatama proposta 2 ba estrada hotu liu liu ba área rural," nia hatete. (*)