Tuir informasaun ne’ebé www.tempotimor.com asesu iha pájina MTKI, sesta (15/07) katak, Xefe Suku Dato, Oscar da Silva apresia tebes ho Governu daualu nia polítika programa sesta-bázika, nune’e fó benefisiu tebes ba povu agrikultór sira hodi rekopera fali ekonomia povu nian.

Tanba iha tinan rua liuba Timor-Leste no mundu infrenta maka’as surtu COVID-19, no halo átividade hotu paradu fó impaktu tebes ba ekonomia rai laran.
“Ha’u nu’udar xefe suku, sente kontente tebes ba VIII Governu nia polítika ida ne’e, tanba liuhusi programa sesta bázika, bele halo rekoperasaun boot ba povu nia ekonomia, tanba durante Timor-Leste hasoru situasaun COVID-19, povu labele asesu mai merkadu nune’e prezudika tebes ba povu nia atividade”, dehan Xefe Suku Dato.

Autoridade lokál Dato konsidera programa sesta bázika bele hakma’an hikas povu nia susar tanba iha tinan rua liu ba situasaun pandemia COVID-19 fó impaktu ba maka’as no povu sira labele asesu ba merkadu.

Diretór Kompaña Hanaroman Brilliant, Fernando Moniz hatete, program sesta bázika atu istimula ema hotu atu filafali ba tós ho natar, atubele produz barak liután produtu-lokál, tanba Governu hahú ona tau prioridade ba programa sesta bázika no oinsá atu hasa’e produsaun alimentar.

“Programa sesta bázika nee di’ak tanba bele kili bosok povu agrikultór atu filafali ba ida-idak nia tós no natar, nune’e hasa’e tan valór produtu lokál, atu oinsá bele eleva liután valór ekonomia rai-laran”, afirma Fernando.

Benefesiáriu Sesta Bázika, Carmen de Jesus Godinho sente, kontente simu sesta bázika, tanba programa ne’e bele ajuda nesesidade uma laran ba loron ida rua nia no sasán ne’ebé simu sente naton ona.

“Ha’u sente kontente tebes simu sasán sesta bázika ne’ebé mak fó husi Governu, ne’e benefisiu mai ami-nia nesesidade uma laran no motivasaun mai ami hanesan ema agrikutór sira”, hatete Carmen.

Iha fatin hanesan Juventude husi Aldeia Leopa, Suku Dato, Valenti de Fátima mós sente orgullu ho programa sesta bázika ne’e, tanba bele motiva ona juventude sira iha aldeia ka baze atu bele badinas liután ba tós.

“Nu’udar juventude iha Aldeia Leopa sente orgullu ho Governu nia prorama nee tanba programa ne’e bele motiva liután ami juventude sira-nia badinas atu halo to’os hanesan ema agrikutór”, dehan nia.

Benefisiariu Siti Nurzanati husi Aldeia Leopa, suku Dato mós sente kontente simu sesta bázika ne’ebé mak oferese husi Governu Konstitusionál daualu.

“Ha’u sente kontente tebes tanba ohin loron hetan netik sasán sesta bázika ne’ebé mak Governu hanoin hodi oferese mai ami povu sira”, afirma nia

Iha Suku Dato iha Aldeia sanulu (10), uma-kain hamutuk rihunrua-atustolu-neennolu-resin-ida (2.361) no benefisiáriu ba prorgama sesta-bázika iha Suku Dato hamutuk Rihun-sanulu-resin. (*)