Print this page

PR Horta Simu Aprezentasaun Proposta Investimentu Pezadu Husi Delegasaun CHMC

Prezidente Repúblika, José Ramos Horta. Prezidente Repúblika, José Ramos Horta. Foto Suplay

Tempotimor (Dili)-Prezidente Repúblika, José Ramos Horta iha loron kuarta (13/07) simu vizita delegasaun China National Heavy Machinery Corportion (CHMC) ne’ebé mak hakarak mai aprezenta sira-nia proposta ba Xefe Estadu kona-ba atu loke investimentu ekipamentu pezadu iha Timor-Leste.

“Iha oras-ida liubá, Prezidente Repúblika simu vizita ida husi kompaña ida ne’ebé atua iha konstrusaun ba ekipamentu pezadu, sira mai hasoru sua eselénsia PR para sira hato’o sira-nia proposta ne’ebé intensaun atu loke investimentu ida iha Timor-Leste, sira mai atu buka oportunidade ba investe iha seitór ne’ebé liga ho sira-nia área de atuasaun”, dehan Portavóz Prezidente Repúblika (PR), Rogeiro Soares iha palásiu Prezidensiál, Bairo Pite, kuarta (13/07).

Ba investimentu ida-ne'e, Prezidente Repúblika esplika iha momentu ida-ne'e Timor-Leste mós presiza duni investimentu maibé tenke investimentu ida ne’ebé mak bele fó impaktu ba kriasaun empregu, hodi absolve taxa dezenpregu iha rai-laran.

Tanba ne'e opsaun ne'ebé Timor-Leste fornese hakarak investimentu ida ne'ebé prioridade aas liu iha área agrikultura, enérjia renovavel no área sira selseluk tán, ke iha ligasaun ho agrikultura, hanesan kafé no sira seluk tán, hodi bele fó impaktu ba mós iha esportasaun ba rai liur.

“Investimentu ne'ebé fó servisu ba ita-nia joven sira ne’e iha primeiru lugar, no segundu lugar mak bele aumenta ita-nia esportasaun ba liur”, afirma nia.

Ho priorisade hirak ne'ebé atualiza husi PR, ne'e parte delegasaun CHMC seidauk iha ideia konkretu ba área sira ne'e.

Maibé felismente sira sei halo deslokasaun ba teritóriu Timor laran tomak hodi haree no observa kondisaun ne’ebé mak favoravel hodi sira bele investe, hafoin sira hasoru filafali Xefe Estadu hodi hato’o sira-nia proposta konkreta kona-ba investimentu tuir rekomendasaun husi PR.

“Importante mós atu realsa katak kompaña ida-ne’e nia atua la’ós de’it iha Timór, nia kompaña internasional ida ne’ebé atua iha nasaun ne’ebé pertense ba organizasaun ou bloku ASEAN  nian”, hatete nia. (*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items