“Kuandu selu hotu ohin, aban ami tun kedas ba servisu, tanba komunidade afeitadu sira ami fahe ona billete hodi hetan indiminizasaun maibé seidauk bele mak ami sei hein hela husi Governu to'o agora”, dehan nia hafoin hetan monitorizasaun husi ajensia tradeInvest Timor iha Suku Tirilolo, Munisípiu Baukau, segunda (11/07).
Tanba investimentu ne’e, Kompaña TL-Cement sei akomoda ema rihun-tolu-resin ne’ebé sei sai hanesan traballadór, maibé servísu tuir etapa.
Jestór Promosaun Investimentu tradeInvest Timor-Leste, Silveiro Freitas hatete, sei lori komunidade no kompaña TL-Cement nia preokupasaun hodi hato’o ba Ministériu relevante hodi aselera selu Indiminizasaun ba komunidade afeitadu sira.
“Kompaña laiha difikuldade kona-ba finansiamentu, taun ida-ne’e ami konvida hotu ona sira, TradeInvest Timor-Leste hanesan fasilitadór ami koko sei ko’alia ho parte terras katak sei bareira boot ne’ebé iha mak Indiminizasaun ba komunidade afeitadu sira, kuandu sira ne’e rezolve ona Kompaña bele hala’o ona nia serbisu”, haktenik nia.
Xefe Suku Tirilolo, Ricardo Belo husu Governu liliu Sekretária Estadu Terras Propriedade atu selu lalais Indiminizasaun ba komunidade afeitadu hodi aselera investimentu produz semente ne’ebé hala’o husi Kompaña TL-Cement.
“Parte kompaña ho Governu servisu hamutuk oinsá ho liña koordenasaun ne’ebé di’ak para fasilita ita-nia joven sira para bele serbisu tanba ami iha ne’e moris mak udan been de’it tanba ne’e rai ida mamuk hanesan ne'e presiza duni loke fábrika hodi nune’e ita-nia joven no komunidade hetan netik buat ruma”, dehan nia.
Tanba investimentu halo semente iha suku Tirilolo, Postu Administrativu Baukau Vila ne'e hahú iha tinan 2014 maibé to’o ona tinan 2022 Kompaña TL-Cement seidauk halo produsaun tanba Governu seidauk selu ka indiminiza komunidade afeitadu sira ai-horis no tós inklui uma komunidade sira-nian.
Ba investimentu ne’e, autoridade sira koopera di’ak tebes ho kompaña sira tanba ne'e selu lalais indiminizasaun sira hodi hahú halo investimentu hodi kria kampu serbisu ba joven sira iha Baukau laran tomak.
“Joven sira husu ba ami bainhirai mak atu loke, bainhira?. Agora joven sira mai presaun ami, agora ami garante katak husi ekipa tomak mai ona iha ne'e katak servisu hamutuk ona, entaun oinsá mak bele haree saida mak sei falta iha ne’ebá, falta iha Governu ka husi kompaña, agora ami komunidade prontu koopera”, hatutan nia.
Nune'e mós Xefe Suku Triloka, Alexadre da Costa hatete, kona-ba loke investimentu iha Baukau laran nia apoiu tebes tanba loke kampu serbisu ba joventude no komunidade sira.
“Ami suku viziñu uluk kedas ami tur hamutuk ami apoiu 100 pursentu tanba ne’e ami nia área, orsida iha fali ha’u-nia suku kona-ba vintuña ne’e mak ha’u ko’alia maibé ami apoiu 100 pursentu”, deklara nia.
Ba progressu servisu ne’ebé kompaña TL-Cement halo mak fura bee matan 25, inklui mós hari’i ona ventunas balun hodi kontrola anin iha Timor-Leste.
Prosesu seluk ne’ebé Kompaña TL-Cement hamutuk ho komunidade iha suku Triloka no Tirilolo halo ona hanesan, iha loron 05 fulan-marsu 2014 halo estudu komparativu iha Austrália durante semana ida.
Nune’e mós iha tinan 2021 komunidade no kompaña hamutuk ho Ekipa Tribunál das Contas Observa diretamente hahú husi Triloka tama to’o Uaiono parte Tirilolo nian, maibé laiha rezultadu.
Ba rai ne’ebé kompaña deside iha suku Tirilolo ba konstrusaun hamutuk 753 ektare ne’ebé sei utiliza ba investimentu ba produsaun semente iha Timor-Leste.
Parte Governu ne’ebé halo monitorizasaun ba investimentu ba Kompaña TL-Cement mak tradeInvest Timor-Leste, SERVE IP, Alfándega, no Tributária, nune’e komunidade sira ne’ebé akompaña mak Xefe Suku Triloka no Tirilolo ho nia Xefe Aldeia sira, inklui Ofisiál Polísia Suku husi suku refere. (*)
