Tuir informasaun ne’ebé www.tempotimor.com asesu husi Pájina MTKI, tersa (12/07) katak, iha lansamentu ne’e, antes atu distribui produtu ba populasaun husi Aldeia Korluli hamutuk 336, Benifisiáriu sira lamenta no lakohi atu simu produtu koto no foremungu ne’ebé identifikadu at ona.

Ho ida-ne’e, kordenadór sesta-bázika halo kedan enkontru ho ekipa monitorizasaun no halo kordenasaun ho empreza distribuidór Bobolait Lda, autoridade lokál Ritabou no benefisiáriu sira hodi buka solusaun.

Liuhusi diskusaun ne’ebé halo, kompaña konkorda atu rekompensa ba produtu sira hodi proteze benefisiariu sira-nia direitu. Nune’e mosu konsensu entre MTKI, lideransa komunitáriu Ritabou, no empreza Bobolait hodi fó kompensasaun no aumenta fali sasán seluk hanesan Mina-tein ho kuantidade litru-rua (2 litru) ba benefisiariu sira.

Kompaña Bobolait kompremete ba Governu liuhusi Ministériu Turizmu, Komérsiu no Indústria (MTKI) katak, kompaña Bobolait sei hadi’a no prepara produtu ne’ebé di’ak hodi distribui ba benefisiáriu iha aldeia 11 husi suku Ritabou. (*)