“Ha'u hanoin iha biban ida-ne'e, MOKATIL sei firme apoiu nafatin polítika husi ita-nia na'i-prezidente nian liliu kona-ba oinsá hasa'e e haforsa ita-nia ekonómia”, dehan nia hafoin finaliza ho PR Horta iha Palásiu Prezidensiál, Bairu Pite, segunda (11/07).
Durante sorumutu refere, MOKATIL hato'o mós progressu servisu ne'ebé mak durante ne'e la'o nomós nia dezafiu sira liliu reafirma pozisaun polítika ba Prezidente Repúblika kona-ba atividade Konferénsia Nasionál ne’ebé hala’o husi MOKATIL no Asosiasaun Combatente Brigada Negra (ACBN) iha Sentru Produsaun Agrikola Proklamadór RDTL Francisco Xavier do Amaral, iha Sarau-Aileu, loron 20 fu'an-dezembru 2020.
Iha ne'e, MOKATIL kontinua husu Prezidente atu tau atensaun maka’as ba setór produsaun sira, no nafatin firme atu defende povu liliu kbi'it la'ek sira, ka povu sira ne'ebé iha área rurál. Tanba hanesan públiku tomak hatene katak povu maiória iha área rurál moris husi vida agrikultór.
Ba asuntu seluk MOKATIL mós konvida Prezidente Repúblika atu partisipa eventu kona-ba asembleia traballadór Nasionál ne'ebé mak sei konsentra masa kamponéz sira husi Membru sira husi Timor laran tomak.
“Ami husu prezidente ba hanesan konvidadu para halo intervensaun polítika ruma no ninia komitmentu ruma durante nia mandatu, e eventu ne'e tuir planu ami sei halo iha Sentru Formasaun Lideransa Kamponeza Francisco Xavier do Amaral, Aileu, ne'ebé mak Prezidente kontente liu no louva atu partisipa iha eventu ida-ne'e”, afirma nia.
Ba sorumutu asembleia traballadór ne'e sei partisipa husi nasaun 82 no Organizasaun masa kamponez sira iha mundu tomak hamutuk 180-resin ne'ebé mak nia reprezentante balun sei mai nomós sei iha zoom meeting.
Haree atividade sira ne'e mak Prezidente Repúblika, José Ramos Horta promete ona sei buka meiu hothotu, nomós konvida parseiru oioin atu oinsá fó apoiu ba membru kamponezes sira liliu inan ho aman sira ne'ebé inklina iha vida agrikultór. (*)