“Tanba ita hothotu hatene katak Knua Buka Hatene ne'e fó formasaun ba ita-nia juventude sira no sentru ida-ne'e sai sentru ho formal ne'ebé gratuitu, ne'e la selu, no sentru ida-ne'e halibur no simu ita-nia inan ho aman sira, povu sira kbi'it-la'ek sira, barak mak tuir kursu lian-inglés, portugéz, komputadór, mais ohin loron hetan presaun husi ita-nia Governu rasik. Tanba notifikasaun ne'ebé mak ba uza Polísia, Veteranu, nomós pesoál balun ne'ebé mak iha poder forsa e poder polítiku”, dehan nia iha Palásiu Prezidensiál Bairo Pite, segunda (11/07).

Ba preokupasaun refere, parte MOKATIL informa ona ba Prezidente Repúblika, José Ramos Horta tanba edifísiu rasik uluk hari’i iha tempu ukun-an liuhusi dezenvolve ideia Kabe Knua Buka Hatene (KBH) maibé ohin loron hetan notifikasaun husi Governu.

“Ami sente ba ladun justu, e notifikasaun ne'e ami konsidera katak ne'e hanesan notifikasaun halo presaun ba ita”, afirma nia.

Maibé ba edifísiu ne'e, Prezidente Repúblika deklara ona sei tau atensaun maka’as hodi ko'alia ho Ministériu Justisa nomós instituisaun Estadu atu haree problema ida-ne'e.

Tanba MOKATIL nia kontribuisaun servisu ne'ebé mak durante ne'e ba Estadu, hanoin maka’as tebes, no ida-ne'e desde husi 1999 mai to'o agora.

“Agora dadaun Organizasaun Naun Governamentál (ONG) barak ne'ebé mak fó formasaun iha ne'ebá, inklui mós MOKATIL nia fatin ne'e mós sai konsentrasaun ba tós na'in sira kuandu halo enkontru boot iha nasionál”, hatete nia. (*)