“Ministériu Finansas mós prevee ona, ba Orsamentu Jerál Estadu tinan 2023, sei integra autoridade nasionál petróleu e Minerais I.P, nune'e sei laiha tán entidade sira ke hola parte iha prema-orsamentál, maibé la integra iha OJE”, dehan Ministru Finansa, Rui Augosto Gomes bainhira partisipa debate Konta Jerál Estadu 2020 iha Plenária Parlamentu Nasionál (PN), segunda (11/07).
Tanba durante ne’e Governu integra de’it mak Institutu Petróleu Jeolójia (IPG) ba Orsamentu Jerál Estadu, maibé ba fali ANPM.IP to’o agora seidauk intergra.
Bainhira ANPM kontinua la integra iha OJE, prátikamenta sei kontribui dezorsamentasaun iha OJE tanba ne’e Governu hakarak halakon, tanba lakohi kestaun dezorsamentasaun ida-ne'e hetan krítika maka’as husi Kámara Konta ho Komisaun C (trata asuntu Finansas Públika) iha Parlamentu Nasionál.
Iha konstituisaun (lei-inan) rasik nomós Lei Enkuadramentu Orsamentál (LEO) determina ona katak reseita no despeza hothotu husi entidade públika sira tenke integra hotu iha OJE.
“Hanesan temi ona iha tinan-kotuk ita konsege integra ona Institutu Petróleo Geolójia (IPG) no agora hela de'it ANPM.IP mak seidauk tama. ita tenta atu integra iha 2023”, hatete nia. (*)