Iha selebra nota entendimentu ne'e, Sekretáriu Estadu Kooperativa (SEKOOP), Elizário Ferreira hatete, programa nasionál ne’e la'o diferente oituan tanba ema ne’ebé hetan saláriu liu $500 sei la simu Sesta Bázika.
“Sesta Bázika, ne’e programa ida kontinua husi programa anterior 2022 nian, ne’ebé mak atu rekopera hikas ita-nia populasaun nia ekonomia família nian diferensa kuandu iha tinan 2020 ne’e universál ba ema hothotu bele simu, maibé ida agora dadaun ne’e la’e, sira ne’ebé saláriu 500 ba leten labele simu ona so sira ne’ebé simu 500 mak kraik”, dehan Elizário Ferreira iha Misionaria Dominikana, Santa Rosa, Ambeno, sábadu (09/07).
Nune’e emprezáriu ne’ebé mak iha ona rendimentu 500 ba leten labele simu, limitasaun mak ida-ne’e, tanba ne’e ba agregadu família ida-ne’e mak nia sirkumstánsia ne’e diferente oituan ho tinan 2020 nian.
Implementasaun antes ne’e, halo adjudikasaun direta maibé agora tenke liuhusi tenderizasaun ida atu nune’e kompaña ida ne’ebé mak manán nia mak sei fahe ba komunidade ka família agregadu sira.
“Segundu kona-ba prosesu, nia adjudikasaun direta maibé agora la’e pur kuaotasaun ne’e katak tenke liuhusi renderizasaun ida para kompaña sira manán tanba ida-ne’e ninia prosesu mós deferente oituan ho ida primeiru ne'e”, haktuir nia.
Prezidente Autoridade Rejiaun Autónoma Espesiál Ambeno Oekussi Ambeno (RAEOA), Arsenio Bano hatete, asina nota entendimentu ho Sekretáriu Estadu Kooperativa (SEKOOP) ne’e sei kobre iha rejiaun tolu ho nia komunidade hamutuk 40.000.
“Ohin hanesan Prezidente Autoridade asina memorandu entendimentu Sekretáriu Estadu ba Kooperativa (SEKOOP) iha faze ida ne’e sei kobre sub-rejionál tolu, mak Passabe Oesilu no Nítibe, ho SEKOOP ne’e kobre komunidade hamutuk 40.000 ba Sesta Bázika ida-ne’e”, informa nia.
Alende ne'e iha Sub-rejiaun ka Kapitál Oekussi sei distribui husi Ministériu Turizmu Komérsiu no Industria ne’ebé sei asina mós nota entendimentu iha semana ne’e nia laran.
Iha tinan 2022 RAEOA mós hala'o ona distribuisaun Sesta Bázika alende iha tinan 2022 sei kontinua hala'o, tanba ne’e mak sei halo preparativu loke renderizasaun hodi kompaña ne’ebé mak sei manán sei halo distribuisaun no sei termina iha fulan-dezembru.
Distribuisaun Sesta Bázika ba daruak SEKOOP mós kobre iha RAEOA iha sub-rejiaun tolu no iha nia suku hamutuk sanulu ba komunidade 40.000 no orsamentu aloka ba programa nasional ne’e hamutuk besik miliaun $2.
Liuhusi prosesu ne’ebé lei fó sai, Sekretáriu Estadu Kooperativa hahú hala’o ligasaun di’ak ho Komisaun Anti Korrupsaun (CAC), Provedoria Direitu Humanus ba Justisa (PDHJ) inklui AIFAESA hodi halo kontrolu ba nia prosesu sira, no tau matan ba ema hotu iha Direitu hetan benefisia ba programa ne'e, no ikus liu mak oinsá atu kontrola produtu sira ne’ebé fahe ba agregadu família ne’e nia kualidade. (*)
