“Ha’u hanoin dehan ami Ermera de’it mak iha kafé, mais Oekussi mós iha, tanba ha’u foin rona dehan Oekussi iha kafé”, dehan nia bainhira hetan vizita Kooperativa Kafé Lakufoan iha Pante Makasar, kinta (07/07).

Nune’e husu atu kontinua nafatin asegura kualidade kafé tanba kafé ne’ebé mak produz iha Timor-Leste ne'e kafé orijinál no la’ós kotaminadu ho kímika.

Koordenadór Grupu Lakufoan, Anita Eko hatete, nia produtu ne'e tama ona ba merkadu Internasionál no nasionál inklui Rejiaun Oekussi.

“Produtu ne’ebé ami iha hanesan kafé sira mak foti no lori ona ba Dubay, nomós loja sira iha Oekussi laran tomak ne'e ami-nia kafé tama hotu ona, nomós balun tama ona ba Dili”, dehan nia.

Ba atividade kuda kafé husi Kooperativa refere ne'e husi Suku Costa, Sub-rejiaun Pante Makasar, Rejiaun Autónoma Espesiál Oekussi Ambeno (RAEOA).

Koordenadór projetu ba programa Agrokomérsiu UNDP, Joni Maria dos Santos hatete, bainhira parte kompetente apoiu ona formasaun ba grupu refere, nia parte ona ba Governu hodi kontinua tau matan.

“Nia estabelese ona sei tuir dalan hela atu rejista ne’ebé agora estatutu mós iha ona, ne’ebé atu husik ona no entrega ba Governu no autoridade atu kontinua akompaña”, afirma nia.

Grupu ne’e hetan ona apoiu husi UNDP mak hanesan, hari’i sede ba grupu refere, no apoiu mós mákina dulas kafé hamutuk tolu.

Hafoin vizita Kooperativa Kafé Lakufoan, Ekipa Sekretária Estadu Kooperativa (SEKOOP) kontinua vizita grupu ida naran Grasa iha Suku Tonom Pante Makasar. (*)