Tuir informasaun ne’ebé www.tempotimor.com asesu iha pájina MAE, segunda (04/07) katak, Vise-Ministru Administrasaun Estatal, Lino de Jesus Torrezão hatete, Ministériu Administrasaun Estatal (MAE) ne'ebé mak ho nia programa rasik, programa ida ne'ebé liuhusi Sekretariadu Tékniku Programa Nasionál Dezenvolvimentu Suku (PNDS) ninian.

“Ita hotu hatene katak Ministériu Administrasaun Estatál hala’o ona nia programa Uma Kbi’it La’ek (UKL) regular, ne'ebé iha tinan 2020 iha Orsamentu Jerál Estadu (OJE 2021) ho totál $25 millaun ba uma iha teritóriu Timor laran tomak hamutuk uma 1.254 no iha suku Lontas ne'e rasik iha uma 3 ne'ebé konklui ona. Iha OJE 2021 ne'e aumenta ba UKL ne'e $71 millaun ne'ebé kada suku ida sei hetan UKL ne'e 10”, informa Vise-MAE, Lino bainhira Partisipa Diálogu Komunitária iha Ámbitu Programa Governu iha Povu nia le'et ho nia Tema ‘Naroman ba Suku’ iha Suku Lontas, Postu Administrativu Lolotoe, Munisípiu Bobonaro.

Tanba ne’e, MAE halo ona reverifikasaun hotu ona no orsamentu mós halo ona transferénsia ba mai iha Munisípiu Bobonaro ona, ho nune’e Prezidente Autoridade Munisípiu Bobonaro tenke halo reverifikasaun ba suku hamutuk 50 iha Munisípiu Bobonaro ne'e.

Ba Programa Uma Kbi’it La’ek (UKL) Plus ne'e iha nia tipe iha rua (2) mak tipe A no tipe B, iha Bobonaro tipe A ne postu Balibo mak hetan no iha tipe B ne'e rasik so iha de’it Maliana mak hetan.

Governu konstitusionál daualu ne'e nia programa ne'e haree liu ba ema, propoin Orsamentu Jerál ne'ebé aprova ona husi Parlamentu Nasionál ne'e husi Primeiru Ministru, Taur Matan Ruak.

Alende ne'e mós hetan Perkupasaun husi Xefe Suku sira atu hari’i no loke Postu Administrativu ida iha Postu Lolotoe, hata'an ba ida ne’e Vise Ministru MAE hatete, atu hari’i no loke postu iha ne'e mak tenki priense rekejitu haree mós ba sosiál kultura, sosiál ekonomia, rekejitu sira ne hotu haree ba ema no istória mós. (*)