“Ba ha’u hanesan administradór postu senti orgullu tanba programa ne’e benefisiu diretamente ba povu no faze ida mós hanesan meus ida ba rekoperasaun ekonomia iha rai-laran. Ha’u apresia tebe-tebes ho Governu ida-ne’e nia programa tanba oferese ai-hán ba povu no materiál sira seluk (subsídiu) atu nune’e komunidade hadi’a ninia moris, tanba tinan barak husi Governu sira uluk la fó buat ida (ai-hán) ba povu”, dehan Alexandre iha pájina MTKI, ne’ebé www.tempotimor.com asesu sábadu (02/07).

Tanba ne’e, orgullu mós katak programa Sesta-Bázika ne’e eduka ema para kuda liliu ba povu agrikultór to’os na’in sira, atubele kuda hare, kuda modo, forekeli, foremunga, koto, atu nune’e rendimentu ba fali sira, iha merkadu Governu sosa depois ikus mai povu sira simu tan sesta-bázika.

“Ne’e siknifika katak Governu nia polítika ida-ne’e, polítika eduka povu atu hatene ona halo to’o no ita labele depedente ba produtu husi rai-liur”, afirma Administradór Postu.

Programa Sesta Bázika benefisia diretamente ba povu, tanba durante ne’e povu hasoru hela krize oioin hanesan impasse polítika, pandemia Globál COVID-19 no kalamidade públiku ka dezastre naturál.

Xefe Suku Poetete, Postu Admnistrativu Ermera Vila, ErmeraFelisberto das Neves, kontente ho programa Governu konstitusionál daualu ne’ebé konsege ajuda komunidade sira.

“Ha’u sente kontente no haksolok tebes ho programa Sesta Bázika husi VIII Governu nia planu ne’ebé diak tebes no hakma’an povu nia kbi’it e nune’e mós hasa’e rendimentu no hasa’e produsaun husi komunidade tós na’in. Ba ami komunidade hetan ai-hán nune’e emprezáriu sira mós hetan osan hodi hamoris sira-nia atividade, tós na’in sira mós aumenta badinas hodi aumenta produsaun produtu-lokál”, dehan nia.

Prezidente Autoridade Munisípiu Ermera, Eusebio Salsina, hato’o profundu rekoñesementu ba Governu ne’ebé iha interese boot atu mellora kondisaun povu Ermera.

“Momentu sira hanesan ne’e atu fó hanoin hela ba ita, atu ita mós tenke hatene no agradese, ita mós tenke rekoñese servisu ne’ebé VIII Governu konstitusionál opta, ida-ne’e merese nafatin povu Poetete munisípiu Ermera nia apoiu atu nune’e apoiu estraordináriu sira mai nafatin”, afirma nia.

Implementasaun polítika ne’e fó hanoin ba ema hotu oinsá atu dezenvolve setór agrikultura ho sériu, tanba ohin loron produtu lokál nia kuantidade la sufisiente atu atende programa distribuisaun Sesta Bázika.

“Agora ita foin sente katak momentu implementasaun Sesta Bázika atu ba sosa de’it kafé, maibé la kafé to’o, ita-nia kafé Ermera bele fó emprezáriu sosa hotu maibé sei lato’o atu distribuisaun programa Sesta Bázika, fós no aifuan sira seluk de’it la to’o. Tanba ne’e sesta-bázika insentiva ita atu iha produsaun boot liután”, katak Prezidente Autoridade.

Postu Administrasaun Ermera totál abitante hamutuk ema na’in-rihun-41-rein mak asesu ba distribuisaun programa Sesta Bázika, Suku Poetete iha aldeia 12 no abitante hamutuk 12.464, kompaña nasionál Betuhei, Lda mak hetan kontratu husi Governu hodi fahe ai-hán ba povu iha suku Poetete.

Emprezariu timoroan, Oscar Lima nu’udar mós na’in ba empreza Betuhei ne’ebé manán konkursu hodi fahe Sesta-Bázika iha suku Poetete.

“Produtu sira ne’ebé mak ami fahe maioria husi rai laran, agora oportunidade di’ak atu povu produz no fa’an ba merkadu, tanba polítika ne’e agora vontade povu nian ami haree ho matan atu halo natar no tós”, dehan Oscar. (*)