Sekretáriu Estadu Kooperativa (SEKOOP), Elizário Ferreira hatete, sira la halo atividade boot maibé realiza de’it semináriu no halo feira hodi hatudu Kooperativa sira-nia kreatividade ba delegasaun husi Indonézia ne’e vizita mai iha Timor-Leste.

“Hatudu ba ita-nia maluk sira husi UNPAD (Universidade Padjadjaran Bandung husi Indonézia) katak ita-nia setór Kooperativa ne'e setór ida ne'ebé kreativu e kontribui mós ba dezenvolvimentu ekonomia rai ida ne'e nia”, dehan nia iha Salaun Federasaun Hanai Malu (FHM), kinta (30/06).

Nune’e SEKOOP presiza hatudu nia promosaun tanba dadaun ne’e Indonézia nu’udar Sekretariadu Kooperativa ba ASEAN nian.

“Tanba saida mak ita tenke promove ida-ne'e agora dadaun Sekretáriadu Ázia ne'e iha Indonézia ninian ordenasaun tanba ida-ne'e mak ita halo promosaun sira hanesan ne'e atu ajuda Governu negosiasaun ida ne'ebé atu sai membru Ázia bele fasil liután tanba ida-ne'e mak ita halo feira ne'e objetivu ne'e la'ós ámbitu nasionál de'it maibé mós ba rejionál sira”, informa nia.

Ho Feira ne’ebé halo sei asina mós nota entendimentu ida ho universidade refere hodi oinsá servisu hamutuk ho SEKOOP haree oinsá atu halo dezenvolvimentu ba rekursu umanu no dezenvolvimentu insititusionál iha Insitituisaun SEKOOP nian.

“Oinsá mak atu asegura instituisaun ida bele sustentavel saudavel no asegura ninia funsionáriu sira-nia insitituisaun ne'e ho rekursu umanu ne'ebé forte no prontu atu oferese ba merkadu ka oferese valór aumentu ba SEKOOP nian no espesífiku no espesiál jeralmente ba Governu”, afirma nia.

Kooperativa Multisetorál sira ne’ebé partisipa iha Feira hanesan, Kooperativa Kréditu Uniaun HIKMOR, Kooperativa Boneka Ataúru, Kooperativa Malibere, Kréditu Uniaun Dadirah, Kooperativa Feto Potensiál, Kréditu Uniaun LANAMONA, Souro Coconut Oil no Nurak Suli Mutu. (*)