“Ha’u senti kontente no haksolok tebes ho programa Sesta-Bázika husi VIII Governu nia planu ne’ebé diak tebes, tanba ho programa Sesta Bázika bele rekopera komunidade nia ekonomia, hakma’an povu nia kbi’it, nune’e mós hasa’e rendimentu ka hasa’e produsaun husi komunidade sira tós na’in, nune’e ba empreza sira bele hetan netik buat ruma, ne’ebé sesta-bázika ba parte tolu hetan hotu nia benefisiu”, dehan Xefe Suku Petete, Feliberto liuhusi pájina MTKI, ne’ebé www.tempotimor.com asesu iha sábadu (02/07).

Tanba programa Sesta Bázika ne’ebé hala’o husi Governu iha faze dahuluk to’o faze daruak nian konsege fasilita komunidade no emprezáriu sira hetan benefisiu.

“Ba ami komunidade hetan aihan nune’e emprezáriu sira mós hetan osan hodi hamoris sira-nia atividade, tós na’in sira mós aumenta badinas hodi aumenta produsaun produtu-lokál tanba ne’e sesta-bázika iha tempu COVID no agora”, afirma nia.

Ba Suku Poetete iha aldeia 12 no abitante hamutuk 12.464, kompaña nasionál Betuhei, Lda mak hetan kontratu husi Governu hodi fahe ai-hán ba povu tomak iha suku Poetete.

Governu konstitusionál daualu liuhusi Ministériu Turismu, Komérsiu no Indústria (MTKI) iha loron 30 fulan-jullu, lansa programa Sesta-Bázika faze daruak iha suku Poetete, Postu Ermera, Munisípiu Ermera.

Komunidade suku Poetete, Armindo Soares Salsina, orgullu tebes tanba tempu ida agora Governu iha responsabilidade ba nia povu.

“Agora Sesta Bázika ba dalarua nian, ami sente katak bele motiva ona ami povu hodi hasa’e tan produsaun ai-hán iha rai laran”, dehan nia.

Diretór Kompaña Betuhei, Oscar Lima, agradese ba Governu nia konfiansa tanba ne’e sei esforsu maka’as atubele distribui hotu iha semana rua nia laran.

“Ami sei kumpri regras ne’ebé mak Governu fó. Momentu ida agora oportunu tebes tanba depois COVID-19, Governu buka kedas alternativa ba nia povu, tanba ne’e ami emprezáriu nasionál ne’ebé mak hetan oportunidade haka’as-an to’o dezembru tenke hotu”, afirma nia. (*)