Sekretáriu Estadu Kooperativa (SEKOOP), Elizário Ferreira hatete, asina nota entendimentu ne’e foku ba área tolu hanesan, dezenvolvimentu ba insititusionál no hari’i relasaun inklui mós asegura dezenvovimentu iha nível ekonomia iha kooperativa nian.

“objetivu husi akordu ida-ne’e ho Universidade Padjadjaran Bandung kona-ba dezenvolvimentu insititusionál no dezenvolve rekursu umanu”, dehan nia ba jornalista sira iha Salaun SEKOOP, Akait, sesta (01/07).

Tanba SEKOOP sei presiza rekursu umanu sira ne’ebé sufisiente atubele fasilita di’ak liután edukasaun formasaun no informasaun ba funsionáriu no povu sira bele hola parte iha vida Kooperativa no espesífiku ba dirijente Kooperativa sira operadór sira atu sira bele hala’o serbí di’ak liután hodi asegura Membru Kooperativa sira.

“Objetivu segundu atu hari’i relasaun ida di’ak entre SEKOOP ho Universidade Padjadjaran Bandung liliu kona-ba interkámbiu ba dirijente Kooperativa sira atubele aprende ba malu hodi bele dezenvolve Kooperativa oinsá atu dezenvolve komunidade iha nível dezenvovimentu iha komunidade nian”, afirma nia.

Liuhusi akordu ne’e mós oinsá atu asegura servisu dezenvolvimentu ekonómiku ida ne’ebé di’ak ba ba dezenvolvimentu Kooperativa nian.

Vise Dekanu ba Rekursu no Organizasaun Fakuldade Polítika Siénsia Sosiál husi Universidade Padjadjaran (UNPAD), Muhammad Benny Alexandri hatete, liuhusi nota entendimentu ne’e sei haruka treinadór hodi fasilita dirijente Kooperativa no kargu Xefia sira iha SEKOOP rasik.

“Ami servisu hamutuk ho SEKOOP iha parte treinamentu no edukasaun, ami sei oferese treinadór husi ami-nia universidade maibé ba dahuluk ami tenke halo indentifika treinamentu saida mak SEKOOP presiza tebes iha tempu ida-ne’e no problema prinsipál saida mak dutante ne’e SEKOOP hasosru hodi dezenvolve kooperativa iha Timor-Leste nune’e ikus mai bele iha rezultadu pozitivu”, dehan nia.

Tanba ne’e, delegasaun sira ne’e sei fila ba Indonézia hodi prepara modulu oinsá bele haree kona-ba produsaun no kualidade produsaun sira iha prosesu merkadória nian.

Ba formasaun iha modulo se prepara husi Universidade maibé dadus ba prepasaun modulo sei foti husi SEKOOP no klaru katak foku importante iha modulo ne’e mak oinsá hasa’e produsaun, kualidade produsaun no proses merkadária rasik. (*)