Tuir informasaun ne’ebé www.tempotimor.com asesu iha pájina MTKI, sesta (01/07) katak, iha tinan-2021 Governu hahú programa SestaBázika fahe ai-hán ba povu, bainhira Timor-Leste no mundu hasoru hela Pandemia COVID-19, ne’ebé fó impaktu maka’as ba ekonomia rai-laran no ba povu nia moris. Tanba ne’e Governu hamosu polítika ida refere hodi rekopera ekonomia.

“Ohin Ministru Turizmu Komérsiu no Indústria mak mai hodi ita-nia na’i Primeiro Ministru, Taur Matan Ruak nia naran, hamutuk ho komunidade sira hodi lansa Programa Sesta Bázika faze-daruak ne’ebé ho Moto katak Ai-hán ba ema hotu”, hatete Ministru  Turismu, Komérsiu no Indústria (MTKI), José Lucas do Carmo da Silva, ba lansamentu iha suku Poetete, kinta (30/06).

Tanba Sesta-Bázika modelu ida husi Programa Rekoperasaun Ekonomia ne’ebé mak hala’o tiha bazeia ba polítika Governu Konstituisionál dahuluk.

Iha governasaun uluk ba hamosu polítika “Povu Kuda Governu Sosa”, maibé ne’e iha tempu ne’eba virál tebes no polítika refere lasusesu, nune’e Governu daulu nia polítika distribuisaun Sesta Bázika nu’udar parte ida hodi insentiva ka motiva povu agrikultór sira oinsá atu produz ai-hán.

“Objetivu prinsipál husi programa sestabazika faze-daruak ne ninian mak primeiru hadi’a ekonomia nasionál, Segundu kria Merkadu ba ProdutuZ Agríkula non-fatorera, datoluk Estimula sirkulasaun Moeda ka Osan iha teritóriU, haforsa seguransa ai-hÁn iha rai-laran no hadi’ak maluk emprezária nasionál sira ninia Cash Flow hodi kria nafatin Kampu traballu ba maluk timoroan, alende ne’e fó espasu ba ita-nia produtu lokál iha rai-laran bele folin e oinsá neneik ba neneik ita bele trava produtu importadu sira”, esplika Ministru José.

Hafoin implementa iha faze-dahuluk liuhusi estudu balu katak iha impaktu ba ekonomia rai-laran, motiva agrikultór sira kuda barak, hakiak barak. Tanba ne’e Governu rona opinaun hirak ne’e, nune’e kontinua tau iha Orsamentu Jerál Estadu 2022.

Alende ne’e, programa Sesta Bázika daruak mai ho enkuadramentu legál ida ne’ebé mak sai baze ba Governu dekretu lei Númeru 10/2022 fulan-Marsu, hamutuk ho Diploma Konjunta 6.

Liuhusi kordenasaun Ministériu Kordenasaun Asuntu Ekonómiku no Ministériu Turizmu Komérsiu no Induústria ho Sekretaria Estadu Kooperativa. Montante orsamentu ne’ebé aloka iha OJE 2022 hamutuk Oitenta Milhões.

Ba área distribuisaun ne’ebé mak resposabiliza husi MTKI mak Munisípiu Dili, Ermera, Likisá, Maliana, RAOEA no Munisípiu Ataúru.

Nune’e husu ba autoridade lokál no povu tomak atu kontribui maka’as liután atubele programa distribuisaun la’o ho susesu.

Tuir dadus benefisiáriu iha suku Poetete, Postu Administrativu Ermera husi aldeia 12, hamutuk ema 12.434, maibé husi dadus ne’e bele aumenta kuandu iha reklamasaun husi komunidade sira.

Prezidente Autoridade Munisípiu Ermera, Eusebio Salsina, fó obrigadu barak ba Governu tanba iha polítika ne’ebé mak di’ak hodi valoriza nia povu sira, fahe ai-hán sesta-bázika.

Tanba programa sesta bázika ne’e bele ajuda mós komunidade sira-nia ekonomia uma laran, maske iha tempu balun de’it, maibé fó benefsisiu duni ba komunidade. (*)